Posted: 05/29/2012 06:39 PM IST

తాను మెచ్చిందే రంభ.. మునిగిందే గంగ అన్నట్టుగా ఉంది క్రికెట్ లెజెండ్ షేన్ వార్న్ గాళ్‌ఫ్రెండ్ ఎలిజబెత్ హర్లీ తీరు..! తన ప్రియుడు వార్న్ సహజ సుందరాంగుడు అని కితాబిస్తోంది ఈ అమ్మడు. అందుకే.. వార్న్‌కు మేకప్ చేసుకోవాల్సిన అగత్యం పట్టలేదని గట్టిగా చెబుతోంది. వార్న్ సౌందర్య సాధనాల (కాస్మోటిక్స్)ను వాడతాడని ఇటీవల వచ్చిన వార్తలను హర్లీ కొట్టిపారేసింది. ‘షేన్.. కనీసం ఐ లైనర్ కూడా వాడడు తెలుసా? అతని కళ్లు సహజంగానే అందంగా ఉంటాయ్. ఓవరాల్‌గా అతని ఫిజిక్ సూపర్‌గా ఉంటుంది. అతను సహజ అందగాడు. ఈ సౌందర్యం వార్న్‌కు జీన్స్ ద్వారా సంక్రమించింది’ అని వివరణ కూడా ఇచ్చింది మరి... వార్న్ పెదాలు దొండపండులా ఎర్రగా ఉంటాయి కదా మేకప్ చేసుకోకుండా ఎలా సాధ్యం అనడిగితే, తమ ముద్దులాటలో బహుశా తన అధర సౌందర్యం... వార్న్ లిప్స్‌ను షైన్ చేసివుండొచ్చు అని కొంటెగా బదులిచ్చింది! వార్నీ.. హర్లీ!

ప్ర పంచ మేటి బ్యాట్స్‌మెన్‌ను కూడా తన స్పిన్ మాయాజాలంతో కంగుతినిపించిన ఆస్ట్రేలియా మాజీ స్పిన్నర్ షేన్ వార్న్‌కు సినీనటి, మోడల్ ఎలిజబెత్ హర్లీని ఆకట్టుకోవడానికి నానా తంటాలు పడాల్సి వచ్చింది. ఎంతో కష్టపడితేగానీ హర్లీ మనసను దోచుకోవడం వార్న్‌కు సాధ్యం కాలేదు. 2010లో ఇంగ్లాండ్‌లో జరిగిన ఒక రేసింగ్ ఈవెంట్‌లో వార్న్ తొలిసారి హర్లీని చూసి మనసు పారేసుకున్నాడు. కొద్ది రోజుల్లోనే వార్న్ తన ట్విటర్‌లో ఈ విషయాన్ని చెప్పకనే చెప్పాడు. హర్లీ కూడా ట్విటర్‌లోనే సమాధానం చెప్పింది. ట్విటర్‌లో ఫొటోలను పెట్టాలంటూ వార్న్‌ను కోరింది. గత ఏడాది అక్టోబర్ నుంచి నవంబర్ చివరి వారం వరకు ట్విటర్ సందేశాలు జోరుగానే సాగాయి. ఒక చానెల్‌లో తాను నిర్వహించే ‘వార్నీ’ కార్యక్రమానికి హాజరు కావాల్సిందిగా హర్లీని వార్న్ ఆహ్వానించడంతో వీరిద్దరి మధ్య ‘సంబంధం’ తెరపైకి వచ్చింది. డిసెంబర్ మాసంలో అరుణ్ నాయర్‌తో తన వివాహ బంధానికి తెరపడినట్టు హర్లీ ప్రకటించి, పరోక్షంగా వార్న్‌కు లైన్ క్లియర్ చేసింది.

మూడు నెలల తర్వాత, ఏప్రిల్ మాసంలో హర్లీ ఇంగ్లాండ్ నుంచి ప్రత్యేకంగా భారత్‌కు వచ్చింది. ఇండియన్ ప్రీమియర్ లీగ్ (ఐపిఎల్)లో వార్న్‌కు మద్దతు తెలపడమే పనిగా పెట్టుకుంది. వీరిద్దరూ బహిరంగంగానే ముద్దులు పెట్టుకుంటున్న ఫొటోలకు విస్తృత ప్రచారం లభించింది. వార్న్, హర్లీ ప్రేమకు ఇదో సంకేతమని మీడియా కథనాలు ప్రచురించింది.