Posted: 05/29/2012 06:51 PM IST

ఇదిగో పెళ్లి అదిగో పెళ్లి అంటున్నారు కానీ ఇప్పటివరకు ఇద్దరూ పెళ్లి పీటల మీద కూర్చోలేదు. పెళ్లి అనేది మగవాళ్ల కెరీర్‌కి ఎలా అడ్డంకి కాదో ఆడవాళ్ల కెరీర్‌కి కూడా అలానే అడ్డంకి కాకూడదు. అందుకే పెళ్లయిన తర్వాత కూడా నేను నిక్షేపంగా సినిమాల్లో కంటిన్యూ అవుతానంటుంది కరీనాకపూర్. సైఫ్‌అలీఖాన్‌తో కరీనా ప్రేమాయణం ఆరంభమై దాదాపు నాలుగేళ్లయ్యింది. ఇ గత ఏడాది పెళ్లి చేసుకోవాలనుకున్నారు కానీ సైఫ్ తండ్రి నవాబ్ పటౌడి చనిపోవడంతో వీరి వివాహం వాయిదా పడింది.

ఈ ఏడాది ఒకింటివారు కాబోతున్నారట. అక్టోబర్ 16న పెళ్లి ముహూర్తం ఖరారు చేశారని సమాచారం. పెళ్లి తర్వాత సినిమాలకు ఫుల్‌స్టాప్ పెట్టేస్తారా? అనే ప్రశ్నను కరీనా ముందుంచితే -‘‘పెళ్లి వల్ల నా లైఫ్‌స్టయిల్‌లో ఏమాత్రం మార్పు రాదు. వృత్తిపరంగా కూడా ఎలాంటి మార్పూ ఉండదు. నాకు యాక్టింగ్ అంటే చాలా ఇష్టం. టైమ్‌పాస్ కోసం కాకుండా ఎంతో ఇష్టంగా సినిమా పరిశ్రమలోకి అడుగుపెట్టాను. మన భారతీయ నటి జోరా సెహగల్ గురించి తెలిసే ఉంటుంది.

ఆమెకిప్పుడు వందేళ్లు. ఈ వయసులో కూడా అడపా దడపా ఆమె సినిమాల్లో నటిస్తున్నారు. నేను కూడా ఆమెనే ఫాలో అవ్వాలనుకుంటున్నా. ప్రస్తుతం చేస్తున్న ‘హీరోయిన్’ చిత్రం షూటింగ్ జులై 25లోపు పూర్తవుతుంది. ఆ తర్వాత సంజయ్‌లీలా భన్సాలీ రూపొందించనున్న ‘రామ్‌లీలా’ షూటింగ్ ఆరంభమవుతుంది. ఈ చిత్రంతో పాటు మరో భారీ చిత్రం కూడా అంగీకరించాను. అది ఈ సంవత్సరం చివర్లో ఆరంభం అవుతుంది. పెళ్లి తర్వాత కూడా నేను హ్యాపీగా సినిమాలు చేస్తాననడానికి ఇంతకన్నా నిదర్శనం ఏం కావాలని అంటుంది కరీనా .