Posted: 05/29/2012 05:49 PM IST

వైఎస్సార్ కాంగ్రెస్ పార్టీ అధినేత జగన్ కు .. కొత్త మిత్రుడు దొరికాడు. ఆపదలో ఆదుకున్నావాడే అసలైన మిత్రుడు అని చెబుతుంటారు. అలాంటి జగన్ విషయం రుజువైనట్లు తెలుస్తుంది. జగన్ అరెస్ట్ ను ఖండిస్తూ.. జగన్ పూర్తి మద్దతు పలికింది ఒక జాతీయ పార్టీ . ఆ పార్టీ మద్దతు దొరకటంతో .. జగన్ కూడా కొంచెం ఆనందంలో ఉన్నాడని జైలు అధికారులు అంటున్నారు.

ఎట్టకేలకు జగన్‌కు ఓ జాతీయ పార్టీ అండ దొరికింది. శత్రువుకు శత్రువు మనకు మిత్రుడనే సూత్రాన్ని బీజేపీ అనుసరిస్తున్నట్లు కనిపిస్తోంది. కాంగ్రెస్‌ను వ్యతిరేకించినందుకే జగన్‌ను అరెస్టు చేశారని బీజేపీ ప్రతినిధి రాజీవ్ ప్రతాప్ రూడీ ఆరోపించారు. సీబీఐ విచారణపై తమకు ఎలాంటి అభ్యంతరాలు లేవని, అయితే కాంగ్రెస్‌ను వ్యతిరేకిస్తున్న వారిపైన మాత్రమే విచారణలు ఎందుకు జరుగుతున్నాయని ప్రశ్నించారు.

అక్రమాస్తులు ఉన్నాయంటూ ఆయనపై కేసులు పెట్టారు.. కానీ జగన్ తండ్రి వైఎస్ హయాంలో జీవోలు జారీ చేసిన ఎనిమిది మంత్రులు ప్రస్తుత కిరణ్ ప్రభుత్వంలో కూడా ఉన్నారు అని గుర్తు చేశారు. వారిపై చర్యలు తీసుకోకుండా జగన్‌నే లక్ష్యంగా చేసుకోవటాన్ని చూస్తే సీబీఐ చర్యలు అనుమానాలు రేకెత్తిస్తున్నాయని వ్యాఖ్యానించారు. కేంద్రంలో కూడా.. తమను వ్యతిరేకించే వారిపై చర్యలు తీసుకునేందుకు కాంగ్రెస్ పార్టీ సీబీఐని ఉపయోగించుకుంటోందని ఆరోపించారు.

చట్టం తన పని తాను చేసుకుపోతుందంటున్న ముఖ్యమంత్రి తన కేబినెట్‌లోని కళంకిత మంత్రులపై చట్టం తనపని తాను ఎందుకు చేసుకుపోవట్లేదో చెప్పాలని కోరారు. కాగా తెలంగాణ అంశానికి, ఆ అంశంపై పోరాడే పార్టీలకు బీజేపీ మద్దతుగా నిలుస్తుందని రూడీ స్పష్టం చేశారు. ఆంధ్రప్రదేశ్‌లో జగన్‌కు ప్రజాదరణ పెరుగుతుండటంతో, కాంగ్రెస్ నాయకులు జగన్‌వైపు వెళుతుండటంతో ఆ రాజకీయ పరిస్థితుల్ని ఎదుర్కొనేందుకు సీబీఐని కాంగ్రెస్ దుర్వినియోగం చేసిందని బీజేపీ ఎంపీ బల్బీర్ పుంజ్ ఆరోపించారు.