Posted: 05/25/2012 08:39 PM IST

గత ఎన్నికల సమయంలో   కాంగ్రెస్ సీటు ఇవ్వలేదని .. తెలుగుదేశం పార్టీలో  చేరిన మైసూరా రెడ్డి ఇప్పుడు టిడిపి వదిలి .. వైఎస్ఆర్ కాంగ్రెస్ పార్టీలోకి అడుగుపెట్టాడు.  మొన్న చంద్రబాబు కూడా  రాజ్యసభ సీటు కు మైసూరా రెడ్డి ఎంపిక చేయకపోవటంతో.. అగిన మైసూరా రెడ్డి  బాబు గుడ్ బై చెప్పి జగన్ కు వెల్ కమ్ చెప్పినట్లు  మీడియా వారు అంటున్నారు.  పదవి కోసం పార్టీలు మారుతున్న మైసూరా ఎన్నిరోజులు  జగన్ తో ఉంటాడో  చూడాలంటున్నారు తెలుగుదేశం పార్టీ నాయకులు .

పదవులే పరమావధిగా మైసూరా రెడ్డి తెలుగుదేశం పార్టీలో ఉన్నారని టిడిపి క్రమశిక్షణా సంఘం చైర్మన్ గోరంట్ల బుచ్చయ్య చౌదరి అన్నారు. మైసూరాది పచ్చి అవకాశవాదం అన్నారు. టిడిపిలో ఆయనకు మంచి ప్రాధాన్యత ఇచ్చామన్నారు. ఆయనకు ఓసారి రాజ్యసభ ఇచ్చామని, అయితే అందరికి ప్రాధాన్యత ఇవ్వాలన్న ఆలోచనతో రెండోసారి ఆయన అడిగినప్పటికీ తాము ఇవ్వలేదన్నారు. దీంతో ఆయన పదవి దక్కక పోవడంతో తమ పార్టీకి దూరమయ్యారన్నారు.

తెలుగుదేశం పార్టీ సీనియర్ నేత, మాజీ రాజ్యసభ సభ్యుడు ఎం.వి.మైసూరా రెడ్డి  వైయస్సార్ కాంగ్రెసు పార్టీలో చేరారు. వైయస్సార్ కాంగ్రెసు పార్టీ నేత వైవి సుబ్బారెడ్డి ఈయనకు పార్టీ కండువా కప్పి ఆహ్వానించారు. పార్టీ కేంద్ర కార్యాలయంలో ఆయన వైయస్సార్ కాంగ్రెసు పార్టీ తీర్థం పుచ్చుకున్నారు.  వైఎస్ జగన్‑మోహన్ రెడ్డికి ఎంవీ మైసూరారెడ్డి సంపూర్ణ మద్దతు ప్రకటించారు. ఆయన ఈరోజు ఉదయం జగన్‑తో భేటీ అయ్యారు. అనంతరం మైసూరారెడ్డి మీడియాతో మాట్లాడుతూ వైఎస్ఆర్ కాంగ్రెస్ పార్టీలో తనకు ఏ బాధ్యత ఇచ్చినా స్వీకరిస్తానని, పార్టీ అభివృద్ధికి శాయశక్తులా కృషి చేస్తానన్నారు. జగన్‑కు ప్రజాదరణ ఉందని, ఉప ఎన్నికల్లో వైఎస్ఆర్ కాంగ్రెస్ పార్టీ విజయం సాధిస్తుందని మైసూరారెడ్డి ధీమా వ్యక్తం చేశారు.

జగన్‑ను రాజకీయంగా ఎదుర్కోలేకనే కాంగ్రెస్ కుట్రలకు పాల్పడుతుందని మైసూరారెడ్డి అన్నారు. సీబీఐ పక్షపాత ధోరణితో వ్యవహరిస్తోందని ఆయన ఆరోపించారు. ఇదంతా ఢిల్లీ పెద్దల కుట్ర అని మైసూరారెడ్డి అన్నారు. తాను ఎన్నడూ చంద్రబాబునాయుడును రాజ్యసభ సీటు అడగలేదని ఆయన తెలిపారు.