Posted: 05/03/2012 03:57 PM IST

సినిమా హీరోల స్టైల్స్ ని, డైలాగ్ లని అప్పుడప్పుడు వాడుతుంటాం. కొందరు అయితే సినిమాలో ఆ హీరో ఎలా చేస్తే బయట కూడా అలాగే చేయడానికి ప్రయత్నిస్తారు. ఇక్కడ అచ్చం అలాగే చేశాడు సూరి హత్య కేసులో ప్రధాన నిందితుడు భాను కిరణ్. రజినీకాంత్ నటించిన శివాజీ సినిమా గుర్తుందా ? ఆ సినిమాలో రజినీ కాంత్ తన దగ్గరున్న బ్లాక్ మనీని హవాలా రూపంలో విదేశాలకు తరలించి, అక్కడి నుండి విరాళాల రూపంలో తెచ్చించుకొని వైట్ మనీ గా మార్చుకుంటాడు.

అచ్చం అలాగే రియల్ లైఫ్ లో చేయాలని అనుకున్న భాను కిరణ్ తన దగ్గరున్న డబ్బులను హవాలా మార్గంలో విదేశాలకు తరలించి, అక్కడి నుండి విరాళాలు, పెట్టుబడుల రూపంలో తిరిగి తెప్పించుకోవాలని భావించాడట. భాను కిరణ్ వద్ద సుమారు వంద కోట్లకు పైగా ఆస్తులు ఉన్నట్లు తేలిందని సమాచారం.

ఇందుకోసం ప్రత్యేకంగా తన సొంత ఖర్చులతో ఇద్దరు పోలీసు అధికారులను తానా సభలకు పంపించాడట. అక్కడి తెలుగువారితో వారు చర్చించి ఈ ప్లాన్‌ను అమలు చేయాలని చూసే లోపే సూరి హత్య జరగడం.. భాను పరారు కావడంతో అంతా ప్లాన్ అంతా తలకిందులైందట. అనంతపురం జిల్లాలో పాలిటెక్నిక్ చదివిన భానుకిరణ్ సాంకేతికంగా మంచి పరిజ్ఞానం సంపాదించాడు. సూరితో పరిచయం అయ్యాక డాన్‌గా ఎదగాలన్న తన కలను సాకారం చేసుకోవాలనుకున్నాడు.ఇప్పటి దాకా అతడు చెప్పినదాన్ని బట్టి దాదాపు రూ.100 కోట్ల ఆస్తులను గుర్తించినట్లు తెలుస్తోంది.

వేరే నిర్మాతల పేర్లతో తాను నిర్మించిన నాలుగు సినిమాలే కాక, మరో రెండు సినిమాల విషయంలోనూ భాను పాత్ర ఉన్నట్లు సిఐడి గుర్తించింది. తమిళంలో నిర్మితమై తెలుగులోకి అనువదించిన పోలీస్ పోలీస్ అనే సినిమా హక్కుల విషయం లో ఇబ్బంది తలెత్తితే కల్యాణ్ ల్యాబ్‌లో సెటిల్ చేసినట్లు తెలిసింది.తొమ్మిది రోజుల కస్టడీలో ఇప్పటికే 8 రోజులు పూర్తయిన నేపథ్యంలో ఇతని ‌పై తొమ్మిది కేసులున్నందున ఏదో ఒక దాంట్లో మళ్లీ కస్టడీ కోరాలని అధికారులు నిర్ణయించినట్లు సమాచారం.

కాగా, సియోనీలో అతడు దుర్భర జీవితం ఏమీ గడపలేదు. ఇక్కడి నుంచి తన అకౌంట్లలోకి రూ.లక్షలు డిపాజిట్ చేయించుకున్నాడని దర్యాప్తులో వెల్లడైంది. ఇక సియోనీలో మకాం పెట్టేందుకు భాను అక్కడ ఓ రిసార్టు కట్టించే నెపం చూపాడట. తాను ఎన్నారైనని, ఇక్కడ రిసార్ట్ పెట్టాలని వచ్చానని భాను స్థానికులతో చెప్పాడట.