Posted: 05/03/2012 03:14 PM IST

గత కొన్ని రోజుల నుండి కాంగ్రెస్ లో కోవర్టులు ఉన్నారని పలువురు రాజకీయ నేతలు అంటున్నవిషయం తెలిసిందే. అయితే ఎవరనేది మాత్రం ఖచ్చితంగా చెప్పలేదు. ఆ మధ్యన బొత్స సత్యనారాయణే కోవర్టుగా వ్యవహరిస్తున్నారని వార్తలు వచ్చాయి. కానీ తాజాగా కాంగ్రెస్ కోవర్టు ముఖ్యమంత్రి కిరణే అని మంత్రి డీఎల్ రవీంద్రారెడ్డి అన్నారు. దమ్ముంటే జగన్ ఆస్తులపై ముఖ్యమంత్రి కిరణ్ ప్రకటన చేయాలని ఆయన సవాల్ చేశారు. జగన్ కు అసలు కోవర్టు కిరణ్ కుమార్ రెడ్డే అని ఆయన ద్వజమెత్తారు. కడప జిల్లా కాంగ్రెస్ నేతలు వీరశివారెడ్డి, వరదరాజులరెడ్డిలతో తనపై కిరణ్ విమర్శలు చేయించారన్న భావనతోనే డి.ఎల్ ఈ వ్యాఖ్యలు చేసినట్లు కనబడుతోంది.

స్పీకర్ గా ఉన్నప్పుడు కిరణ్ నలభై ఎనిమిది సార్లు అడ్డదారిలో అదిష్టానాన్ని కలిశారని కూడా ఆయన ఆరోపించారు.వీరశివ,వరదరాజులు రెడ్డిలు పైరవీలు చేసుకోవడానికే తనపై విమర్శలు చేస్తున్నారని వ్యాఖ్యానించారు. వారు తనపై అవినీతి ఆరోపణలు ఉంటే నిరూపించాలని అన్నారు. మొత్తం మీద డి.ఎల్.చేస్తున్న విమర్శలు ఉప ఎన్నికల వేళ పార్టీకి ఇబ్బంది కలిగించే అవకాశం ఉన్నట్లు కనబడుతోంది.జూన్ పన్నెండు తర్వాత రాష్ట్రంలో మార్పులు ఉంటాయని భావిస్తున్నట్లు కూడా ఆయన చెప్పారు.శ్రీకాంతరెడ్డి, శ్రీనివాసులు పై అనర్హత వేటు వేయకుండా ముఖ్యమంత్రి ప్రయత్నం చేశారని కూడా ఆయన ఆరోపించారు.
సన్యాసి – సన్యాసి కలిస్తే బూడిద రాలినట్లు కాంగ్రెస్ లోని ముఖ్యనేతలు ఒకరి పై ఒకరు విమర్శలు చేసుకుంటూ పరువును బజారున పడేసుకుంటున్నారని అనుకుంటున్నారు.