Posted: 04/05/2012 06:14 PM IST

తెలంగాణ కోసం కేసిఆర్ కొత్తగా త్యాగం చేయాలని నిర్ణయించుకున్నాడు. అందుకే ఢిల్లీలో కొన్ని రోజుల నుండి అమ్మ దర్శనం కోసం ప్రత్యేక పూజలు చేస్తున్నాడట. ఈ సారి కేసిఆర్ చేసే త్యాగంతో తెలంగాణ వస్తుందని ఆయన సన్నిహితులు చెబుతున్నారు. 

ప్రత్యేక తెలంగాణ రాష్ట్ర సాధన కోసం తెలంగాణ రాష్ట్ర సమితి అధినేత కె.చంద్రశేఖర్ రావు తన మానస పుత్రికైన టీఆర్ఎస్‌ను పణంగా పెట్టేందుకు సిద్ధమైనట్టు తెలుస్తోంది. ప్రస్తుత పరిస్థితుల్లో ప్రత్యేక రాష్ట్రాన్ని ఏర్పాటు చేసేందుకు అటు కాంగ్రెస్‌తో పాటు.. ఇటు యూపీఏ సర్కారు సిద్ధంగా లేదన్న సంకేతాలు స్పష్టంగా వస్తున్న తరుణంలో టీఆర్ఎస్‌ను విలీనం చేసేందుకు ఆయన సమ్మతించినట్టు ఢిల్లీలో ఊహాగానాలు వినొస్తున్నాయి.

గత 11 రోజులుగా ఢిల్లీలో మకాం వేసి ఉన్న కేసీఆర్... కాంగ్రెస్ అధినేత్రి సోనియా గాంధీతో తన ఆప్తులతో రహస్య రాయబారం నడిపిస్తున్నట్టు వినికిడి. ఇందులో భాగంగా.. ఆయన తెలంగాణ ఏర్పాటుకు చర్యలు తీసుకుంటే తన పార్టీని కాంగ్రెస్‌లో విలీనం చేయడానికి సిద్ధంగా ఉన్నామనే సంకేతాలను పంపినట్టు సమాచారం.

అందువల్లే ముఖ్యమంత్రి కిరణ్ కుమార్ రెడ్డి, పీసీసీ చీఫ్ బొత్స సత్యనారాయణ, పీసీసీ మాజీ చీఫ్ డీఎస్, డిప్యూటీ సీఎం దామోదర రాజనర్శింహలను అంతర్గత పంచాయతీ పేరుతో తెలంగాణ ఏర్పాటుపై చర్చించినట్టు తెలుస్తోంది.

అయితే, తెలంగాణ ఇస్తే సీమాంధ్రలో పార్టీ మనుగడ పూర్తిగా కోల్పోయినట్టేనన్న భావను కొందరు నేతలు వ్యక్తం చేశారు. అలాగే, తెలంగాణ ఇవ్వకుంటే ఆ ప్రాంతంలో కాంగ్రెస్ కోలుకోలేదని కూడా వారే చెపుతున్నారు. మొత్తం మీద ఇటీవల వెల్లడైన ఏడు అసెంబ్లీ స్థానాల ఉప ఎన్నికల ఫలితాలు కాంగ్రెస్‌ పార్టీని కళ్లు తెరిపించినట్టుగా భావిస్తున్నారు.