Posted: 01/11/2012 06:48 PM IST

‘సూపర్’ సినిమాతో తెలుగు తెరకు పరిచయం అయిన భామ అనుష్క. ఈ సినిమాలో నాగార్జున సరసన నటించి ఈ జోడి సూపర్ గా ఉంది అని అనిపించుకుంది. తరువాత తన నటనతోనే కాకుండా అందం, ఒంపుసొంపులతో కూడా అందరిని మెప్పించి టాలీవుడ్ లో టాప్ హీరోయిన్ రేంజ్ కి చేరుకుంది. ‘అరుంధతి’ లాంటి చిత్రాల్లో తన అద్భుతమైన నటనను కనబరిచి తెలుగు ప్రేక్షకుల గుండెల్లో పాతుకుపోయింది. తరువాత ఈ అమ్మడికి రేంజ్ పెరిగిపోయిందో లేక పక్క భాషా చిత్రాల రుచి చూడాలనుకుందో కానీ బాలీవుడ్ కి వెళ్ళాలని ఆశ పడింది.

అక్కడ రాక రాక ఓ అవకాశం వస్తే దాన్ని సున్నితంగా తిరస్కరించింది. అయితే అరుంధతి తరువాత అనుష్కకు తెలుగులో అంత పెద్దగా అవకాశాలు రాలేదు. పోయిన సంవత్సరం అనుష్కకు ఏ మాత్రం కలిసిరాలేదనే చెప్పాలి. టాలీవుడ్‌లో అసలు ఏ చిత్రం చెయ్యలేదు. తమిళంలో మాత్రం ‘వానం’, ‘దైవతిరుమగల్‌’ చిత్రాలు ఆమెకు నటనలో మంచి మార్కులు వేయించాయి. తమిళ విమర్శకులు సైతం అనుష్క నటనకు నీరాజనాలు పలికారు. ఆ ఊపులోనే మరికొన్ని తమిళ చిత్రాల ఆఫర్లు వెల్లువెత్తాయి. అయితే టాలీవుడ్‌లో మాత్రం అనుష్క పరిస్థితి అంతగా ఆశాజనకంగా లేదు. ఈ సంవత్సరం మాత్రం నాగార్జున హీరోగా శ్రీనివాసరెడ్డి దర్శకత్వంలో వస్తున్న ‘డమరుకం’ చిత్రంపై మంచి ఆశలే పెట్టుకుంది అనుష్క. ఈ చిత్రంలో అనుష్క పాత్ర ‘జగదేకవీరుడు-అతిలోక సుందరి’ చిత్రంలో శ్రీదేవి పోషించిన దేవకన్యలాంటి పాత్ర అంటున్నారంతా.

ఈ చిత్రం తర్వాత ప్రభాస్‌ కథానాయకుడుగా నటించబోయే ‘సారథి’ చిత్రంలో నటిస్తోంది. ఈ రెండు చిత్రాలు ఇదే సంవత్సరంలో విడుదలయ్యే అవకాశాలు ఉన్నాయి. ఇంకా అనుష్క ‘రంపచోడవరం’ అనే ఓ చారిత్రాత్మక హీరోయిన్‌ ఓరియెంటెడ్‌ చిత్రంలో కూడా నటిస్తోంది. అయితే ఈ సంవత్సరం విడుదలయ్యే ‘డమరుకం’, ‘సారధి’ హిట్టు అవుతాయని, 2012 సంవత్సరం నాదేనని అంటోంది అనుష్క..