Posted: 11/19/2011 06:36 PM IST

కలిసి ఉన్నంత కాలం పనిగట్టుకొని మాపై ఏవేవో ప్రచారాలు చేశారు. ఇప్పుడు విడిపోయాం. అయినా మమ్మల్ని వదలడంలేదు. ఇందులో మీకొచ్చే ఆనందం ఏమిటో నాకు అర్థం కావడం లేదు. కష్టపడి సెలబ్రిటీ స్థాయికి ఎదగడమే మేం చేసిన తప్పా?’’ అని మీడియాను సూటిగా ప్రశ్నించారు బాలీవుడ్ భామ బిపాసాబసు. కొన్నాళ్ల సహజీవనం అనంతరం జాన్ అబ్రహం, బిప్స్ మనస్పర్థల కారణంగా విడిపోయిన విషయం తెలిసిందే.

ప్రస్తుతం జాన్ పేరెత్తితే బిప్స్ తాచుపాములా అంతెత్తు లేస్తున్నారని, బిప్స్ ప్రస్తావన తెస్తే జాన్ కూడా ఆగ్రహంతో ఊగిపోతున్నారని ప్రసుతం బాలీవుడ్ మీడియాలో పలు కథనాలు ప్రసారం అవుతున్నాయి. వీటిపై స్పందిస్తూ బిప్స్ పై విధంగా స్పందించారు. ‘‘అభిప్రాయభేదాల కారణంగా మేం విడిపోయిన మాట నిజం. కానీ ఒకరిపై ఒకరికి ఉన్న గౌరవం మాత్రం ఇసుమంత కూడా తగ్గలేదు. ఇప్పటికీ మేం మంచి స్నేహితులమే. వ్యక్తిగత విషయాల గురించి కూడా మీడియాకు వివరణ ఇచ్చుకోవాల్సిన పరిస్థితి రావడం నిజంగా దురదృష్టకరం’’ అని ఆవేదన వ్యక్తం చేశారు బిప్స్.

‘‘‘రేస్-2’లో నేను నటిస్తున్నానని తెలియగానే... మళ్లీ మా మధ్య ప్రేమ మొదలైందని రాసేశారు. అందులో నాది జస్ట్ గెస్ట్ రోల్ మాత్రమే. జాన్ కాంబినేషన్‌లో సీన్లు కూడా చాలా తక్కువ. షూటింగ్ స్పాట్‌లో మేము చాలా ఫ్రెండ్లీగా ఉన్నాం. ‘మీరిద్దరూ మళ్లీ కలుస్తున్నారటగా?’ అని జాన్‌ని మీడియా అడిగితే... తను నన్ను తిట్టేశాడని ఓ పత్రికలో వచ్చింది. తను ఎలాంటి వాడో నాకు తెలుసు. ఇన్ని రకాల గాసిప్స్ మాపైనే ఎందుకు వస్తున్నాయో అర్థం కావడం లేదు’’ అన్నారు .