భర్తతో సినిమా వదులుకున్న ఐష్

Posted: 02/12/2018 05:38 PM IST

బాలీవుడ్ అందాల తార ఐశ్వర్య రాయ్ గురించి బాలీవుడ్ మీడియాలో ఇప్పుడు మరోవార్త హల్ చల్ చేస్తోంది. రెమ్యునరేష్ పిచ్చితో ఆమె అందివస్తున్న అవకాశాలను జేజార్చుకుంటుందని వరుసగా కథనాలు వెలువడుతున్నాయి. ముఖ్యంగా చాలా కాలం తర్వాత భర్త అభిషేక్ తో నటించే అవకాశం దక్కినా ఆమె వదలుకుందని ఓ వార్త బాగా చక్కర్లు కొడుతోంది.

వివరాల్లోకి వెళ్తే... తన భర్త అభిషేక్ బచ్చన్ తో కలసి నటించే అవకాశం ఆమెకు వచ్చిందంట. కథను విన్న వెంటనే ఆ సినిమాలో నటించేందుకు భార్యాభర్తలు ఇద్దరూ ఓకే చెప్పారట. అయితే, కథలో చిన్నపాటి మార్పులు చేయాలంటూ ఐశ్వర్య సూచించిందట. ఐష్ కోరిన విధంగానే సదరు దర్శకుడు కథలో మార్పులు చేసి తీసుకెళ్లాడట. అయితే, ఇప్పుడు ఆమె ప్లేట్ ఫిరాయించినట్లు తెలుస్తోంది.

ఈ సినిమా చేయలేనని, మరో సినిమా కోసం రూ. 10 కోట్లు తీసుకున్నానని ఐష్ చెప్పిందట. కథ మారిస్తే తన సినిమా చేస్తానని చెప్పారు కదా అని దర్శకుడు అడిగితే... పది కోట్లు ఇస్తుంటే సినిమాను ఎలా వదులుకుంటానని ఆమె బదులు ఇచ్చిందంట. కావాలంటే ఈ సినిమా పూర్తయిన తర్వాత మీ సినిమా చేస్తానని చెప్పటంతో చేసేది లేక దర్శకుడు వెనుదిరిగినట్లు తెలుస్తోంది. భర్తతో కలసి నటించే అవకాశం లేకలేక వస్తే... డబ్బు పిచ్చితో ఆమె ఆ అవకాశాన్ని వదిలేసుకుందంటూ కామెంట్లు వినిపిస్తున్నాయి.