రైతు కుటుంబాలను ఆదుకున్న ధనుష్

Posted: 08/03/2017 06:02 PM IST

కోలీవుడ్ హీరో ధనుష్ కి అక్కడ ఉన్న క్రేజ్ ప్రత్యేకంగా చెప్పనక్కర్లేదు. అయితే కొంత కాలంగా సుచీ లీక్స్ తో వార్తల్లో నానుతూ వస్తున్న రజనీ అల్లుడికి హిట్లు కూడా లేకుండా పోయాయి. ఈ నేపథ్యంలో వీఐపీ 2 తో రాబోతున్నాడు. ఫస్ట్ టైం తెలుగులో కూడా స్ట్రెయిట్ మూవీతో పలకరించబోతున్నాడు ధనుష్. ఓవైపు ఈ చిత్ర ప్రమోషన్ లో బిజీగా ఉంటూనే.. మరోపక్క తన వంతు సాయం చేస్తున్నాడు.

తమిళనాడులో పంట నష్టాల కారణంగా రైతుల ఆత్మహత్యలు పెరిగిపోతున్నాయి. ఈ కష్టాన్ని గట్టెక్కలేమని భావించిన వాళ్లు గుండెపోటుతో కుప్పకూలుతున్నారు. అలా యజమానిని పోగొట్టుకున్న రైతుల కుటుంబాలకు హీరో ధనుష్ తన వంతు సాయాన్ని అందించాడు. తన స్వగ్రామం శంకరాపురం లో కులదైవమైన కురుప్పస్వామి ఆలయాన్ని ఏటా దర్శిస్తుంటాడు ధనుష్. ఈ యేడూ అక్కడ రైతులు పెద్ద సంఖ్యలో చనిపోయారన్న వార్త అతన్ని కదిలించింది.

అంతే వెంటనే స్పందించి వారి జాబితా తెప్పించుకున్నాడు. మొత్తం 125 మందికి మొదటి విడతలో భాగంగా వారి కుటుంబాలకు ఆర్ధిక సాయాన్ని అందించాడు. ఒక్కో ఇంటికి 50,000 రూపాయలను అందించాడు. మరో విడతలో మరికొంత మందికి సాయాన్ని అందించనున్నట్టు తెలిపాడు. ఈ కార్యక్రమంలో భార్య ఐశ్వర్య కూడా పాల్గొనగా, గ్రామస్థులంతా ధనుష్ పై ప్రశంసలు కురిపిస్తున్నారు.