మరో వివాదంలో నటుడు ప్రకాశ్ రాజ్

Posted: 03/03/2017 03:29 PM IST

సీనియర్ నటుడు ప్రకాశ్ రాజ్ వివాదాలకు కేరాఫ్ అడ్రస్. తరచూ సెట్స్ కి లేట్ గా రావటం, చిత్ర యూనిట్ సభ్యులతో గొడవ పెట్టుకుని రచ్చ చేయటం ఆ మోనార్క్ కి బాగా అలవాటే. దాదాపు అన్ని భాషల ఫిల్మ్ ఛాంబర్ లలో, ప్రొడ్యూసర్ కౌన్సిల్స్ లో ఈయన గారిపై ఫిర్యాదులున్నాయంటే అతిశయోక్తి కాదు. అయితే ఈ మధ్య అది కాస్త డైవర్షన్ తీసుకుని పొలిటికల్ రూట్ లోకి కూడా వెళ్లింది. కావేరీ జ‌లాల వివాదం, జల్లికట్టు లాంటి సున్నిత అంశాలపై తనదైన శైలిలో రెస్పాన్స్ కావటమే కాదు, ప్రశ్నించిన మీడియా వాళ్లపైనా ఫైర్ అయ్యాడు.

తాజాగా మరోసారి తన సహనం కోల్పోయి అభిమానితో దురుసుగా ప్రవర్తించాడు. ఓ చిత్రం కోసం విదేశాలకు వెళ్లిన ప్రకాశ్ రాజ్ బుధవారం ఉదయం చెన్నై విమానాశ్రయంలో ల్యాండ్ అయ్యాడు. ఎయిర్ పోర్ట్ లో అతన్ని చూసిన అభిమానులు ఆటోగ్రాఫ్ ల కోసం ఎగబడ్డారు. అయితే అప్పటి దాకా నవ్వుతూ ఉన్న ప్రకాశ్ రాజ్ సడన్ ఓ అభిమాని చేసిన పనితో చిరాకు పడ్డాడు.

సెల్ఫీ తీసుకోవాలని ముచ్చ‌ట‌ప‌డి, అందుకోసం ప్రయత్నించిన ఓ ఫ్యాన్ ఫోన్ ను లాక్కుని నేలకేసి పగలగొట్టాడు. ఆపై అక్కడి నుంచి తాపీగా వెళ్లిపోయాడు కూడా. దీంతో ఆ అభిమాని ఇష్టం లేకపోతే వద్దని చెబితే స‌రిపోయేది క‌దా అంటూ వాపోయాడు. వెంట‌నే విమానాశ్రయ అధికారులకు ఫిర్యాదు చేయగా, అప్పటికే ప్రకాష్ రాజ్ ఎయిర్‌పోర్టు నుంచి వెళ్లిపోవటంతో చేసేది ఏం లేక అంతా సైలెంట్ అయిపోయారు.