ఖైదీ, శాతకర్ణి పెద్ద సమస్యేం కాదు

Posted: 01/04/2017 05:39 PM IST

గత కొంతకాలంగా సైలెంట్ గా ఉన్న దర్శకరత్న దాసరి నారాయణరావు క్రేజీ అనౌన్స్ మెంట్ తో ఒక్కసారిగా వార్తల్లోకి వచ్చేశారు. తమిళనాడు మాజీ ముఖ్యమంత్రి, అమ్మ జయలలిత జీవితంపై బయోపిక్ తీసేందుకు ఆయన సన్నాహాలు చేస్తున్నారన్న వార్త గత రెండు మూడు రోజులుగా వార్తల్లో హల్ చల్ చేస్తోంది. ఆ వార్త నిజమేనని స్వయంగా ఆయనే ప్రకటించారు. అంతేకాదు  ప్రస్తుతం కథ రాసే పనిలో ఉన్నానని చెప్పిన ఆయన లీడ్ రోల్(రమ్యకృష్ణ, త్రిష పేర్లు పరిశీలనలో ఉన్నట్లు టాక్) ఎవరిదో చెప్పకుండా కొత్త వాళ్లతో కేవలం నెల రోజుల్లో సినిమా తెరకెక్కిస్తానని షాక్ ఇచ్చారు.

ఇక ఖైదీ నంబర్ 150 ప్రీరిలీజ్ వేడుకకు మరో దిగ్గజం రాఘవేంద్రరావుతో కలిసి హాజరవుతానని చెప్పేశాడు. గతంలో చిరంజీవి కెరీర్ లో విజయవంతమైన సినిమాలన్నింటికీ తానే ముఖ్య అతిథిగా హాజరయ్యానని, చిరు ఫంక్షన్ అంటే తనకు సొంత ఫంక్షన్ అని ఆయన తెలిపాడు. తనకు అవసరమైన స్టార్ డమ్ చిరు ఇప్పటికే సంపాదించేశాడని, అయితే ఆ క్రేజ్ ఉందా? లేదా? అని చెప్పడానికి ఈ సినిమా పునాది అవుతుందని తెలిపాడు. ఇక ఖైదీ కోసం చిరు కష్టం గురించి కెరీర్ తొలినాళ్లలో ఎంత కష్టపడ్డాడో ఇప్పుడు కూడా అంతే కష్టపడ్డాడని తెలిపాడు.

తన 50 ఏళ్ల కెరీర్ లో హీరోలందరినీ చూస్తూ వచ్చానని, ఒకవేళ వారిని తానేదైనా అన్నా వారు సీరియస్ గా తీసుకోరని ఆయన తెలిపారు. టాలీవుడ్ లో సంక్రాంతికి 3 పెద్ద సినిమాలను భరించగల శక్తి ఉంటుందని ఆయన అన్నారు. తొలి రోజు ఏ హీరో ఫ్యాన్స్ ఆ హీరో సినిమా చూస్తారని, రెండో రోజు ఇద్దరు హీరోల ఫ్యాన్స్ కలిసి ఒక సినిమా చూస్తారని ఆయన అన్నారు. అలాంటిది రెండు పెద్ద సినిమాలన్నది పెద్ద సమస్య కాదని.. 'ఖైదీ నెంబర్ 150', 'గౌతమీపుత్ర శాతకర్ణి' చిత్రాలు ఒకేసారి విడుదలవడంపై ఆయన వ్యాఖ్యానించారు. రెండూ వేటికవే వైవిధ్యమైన కథాంశం గల సినిమాలని ఆయన చెప్పారు. అందుకే తెలుగు సినీ ప్రేక్షకులు ఈ రెండు సినిమాలను ఆదరిస్తారని ఆయన తెలిపారు.