స్టార్ హీరోలు ఎవరైనా ముందుకు రావోచ్చుకదా!

Posted: 11/23/2016 12:38 PM IST

టాలీవుడ్ దర్శకుడు రవిబాబు సినిమాలంటే ఎలా ఉంటాయో ప్రత్యేకంగా చెప్పాల్సిన అవసరం లేదు. ఇండస్ట్రీలో అలాంటి ఆలోచనలు బహుశా ఏ దర్శకుడికి కూడా రావేమో. హాలీవుడ్ లో స్ఫూఫ్ సినిమా తరహాలో కామెడీని ప్రజెంట్ చేసే రవిబాబు ఆ మధ్య సీరియస్ సినిమాలతో ప్రయోగానికి దిగాడు. కానీ, ఫలితం మరోలా వచ్చింది. దీంతో మరోసారి తన రెగ్యులర్ ఫార్మట్ లోనే వెళ్లేందుకు సిద్ధమైపోతున్నాడు.

అదుగో అనే టైటిల్ తో కొత్త వాళ్లతో ఓ సినిమాను స్టార్ట్ చేయటం, అది కాస్త పిగ్ లెట్ సినిమా కావటంతో ఇండస్ట్రీలో హాట్ టాపిక్ గా మారిపోయింది. ఓ పంది ప్రధాన పాత్రలో కొనసాగే ఈ సినిమా టాకీ పార్ట్ ఎప్పుడో పూర్తయినప్పటికీ ప్రాజెక్టు మాత్రం చాలా డిలే అయిపోయింది. అయితే అది ఎందుకో అసలు కారణం చెప్పేస్తున్నాడు రవిబాబు.

హాలీవుడ్ సినిమాల్లో ఈ తరహా చిత్రాలకు బడా స్టార్లతో జంతువులకు వాయిస్ ఓవర్ ఇప్పించటం చాలా మాములు విషయం. రవి కూడా అదే తరహాలో ఓ పెద్ద హీరోతో వాయిస్ ఓవర్ ఇప్పించేందుకు ప్రయత్నాలు చేశాడంట. అయితే అందుకు ముందుకు ఎవరూ రాకపోవటంతో జాప్యం జరుగుతోందని తెలుస్తోంది. ఇండస్ట్రీ మొత్తానికి క్రేజీ ప్రాజెక్టుగా చెప్పుకుంటున్న ఈ పిగ్ కోసం ఎవరో ఒకరు ముందుకు రావాలంటూ రవిబాబు ఇప్పటికే విజ్నప్తి చేశాడు కూడా.

అన్నట్లు ఆ పందిని విడిచి క్షణం ఉండలేకపోతున్న రవిబాబు, ఈ మధ్య ఓ ఏటీఎం వద్ద డబ్బుల కోసం లైన్ లో నిల్చున్నప్పుడు కూడా దాన్ని చేతిలో పట్టుకునే ఉన్నాడంటే ఆ పంది మీద ఎంత ప్రేమ పెంచుకున్నాడో అర్థం చేసుకోండి.