భయపడేది లేదంటున్న శింబు.. అంతా దేవుడే చూసుకుంటాడట!

Posted: 12/17/2015 04:53 PM IST

తమిళ హీరో శింబు, సంగీత దర్శకుడు అనిరుధ్ ల ‘బీప్ సాంగ్’ సంచలనం సృష్టించిన విషయం తెలిసిందే. ఇందులో మహిళలను అగౌరవపరిచే విధంగా అసభ్యపదజాలాలతో కూడిన పాట రాసి, పాడారంటూ మహిళా సంఘాలు ఆందోళనకు దిగాయి. శింబు, అనిరుధ్ లపై తగిన చర్యలు తీసుకోవలసిందిగా మహిళా సంఘాలు కోవై పోలీస్ కమీషనర్ అమల్ రాజ్ కు ఫిర్యాదు చేసారు.

అయితే కేసు నమోదు చేసిన పోలీసులు శింబు, అనిరుధ్ లను అరెస్ట్ చేయడానికి సిద్ధమయ్యారు. కానీ అనిరుధ్ మ్యూజికల్ షో కోసం కెనడా వెళ్లాడు. ఇక శింబు మాత్రం అరెస్ట్ చేస్తారేమోనని భయపడి, అజ్ఞాతంలోకి వెళ్లినట్లుగా గతకొద్ది రోజులుగా వార్తలొస్తున్నాయి. అయినా కూడా పోలీసులు చెన్నై నగరమంతా జల్లెడ పడుతున్నారు. శింబు కోసం పోలీసులు తీవ్రంగా గాలిస్తున్నారు. మరోపక్క మాదర్ సంఘానికి చెందిన వారు శింబు ఇంటిని చుట్టుముట్టి ఆయనను అరెస్ట్ చేయాలంటూ ఆందోళనకు దిగారు. పరిస్థితి ఉద్రిక్తంగా మారుతోంది.

అయితే ఈ విషయంపై శింబు ఎట్టకేలకు స్పందించారు. తానేమి అజ్ఞాతంలోకి వెళ్లలేదని, సమస్యను ఎదుర్కొనడానికి తాను సిద్దంగా వున్నానని తెలిపారు. ఇక్కడ కనిపించకుండా పోవడం, పారివడం వంటి ఏం జరగలేదని తెలిపారు. తాను దేవుడిని నమ్ముతానని, అతనే అన్ని చూసుకుంటాడని శింబు తెలియజేసాడు. మరి శింబు ఎప్పుడూ పోలీసుల ముందుకు వస్తాడో చూడాలి. ఇక శింబు మీడియా ముందుకు వస్తే అనిరుధ్ కూడా వస్తాడేమో చూడాలి.