నైజాంలో బెంగాల్ టైగర్ కలెక్షన్ల మోత

Posted: 12/15/2015 10:36 AM IST

మాస్ మహారాజ రవితేజ కథానాయకుడిగా శ్రీసత్యసాయి ఆర్ట్స్ పతాకంపై ప్రముఖ నిర్మాత కె.కె.రాధామోహన్ నిర్మించిన ‘బెంగాల్ టైగర్’ గత గురువారం విడుదలై సూపర్ హిట్ టాక్ తెచ్చుకోవడంతోపాటు, ఈ చిత్రాన్ని కొనుక్కొన్న డిస్ట్రిబ్యూటర్లకు, ఎగ్జిబిటర్లకు మంచి లాభాలు తెచ్చిపెడుతూ బ్లాక్ బస్టర్ హిట్ దిశగా దూసుకుపోతోంది.

కేవలం మొదటి నాలుగు రోజుల్లోనే ఆంధ్ర-తెలంగాణ ప్రాంతాల్లో 16 కోట్ల రూపాయలకుపైగా వసూల్లు సాధించి.. సోమవారం కూడా హౌస్ ఫుల్ కలెక్షన్స్ తో ‘బెంగాల్ టైగర్’ చిత్రం డిస్ట్రిబ్యూటర్ల పాలిట కల్పతరువుగా మారింది. సోమవారం నాటికే బ్రేక్ ఈవెన్ రెవెన్యూస్ సాధించడం ఇందుకు కారణం. ముఖ్యంగా నైజాంలో 4 రోజుల్లో 6 కోట్ల రూపాయల వసూళ్ళు సొంతం చేసుకొని ‘బెంగాల్ టైగర్’ చిత్రం రవితేజ కెరీర్ లోనే బిగ్గెస్ట్ హిట్ గా నిలవడం విశేషం.

ఈ సందర్భంగా చిత్ర నిర్మాత కె.కె.రాధామోహన్ మాట్లాడుతూ.. "ఈ మధ్య కాలంలో భారీ బడ్జెట్ చిత్రాలకు రెవెన్యూ పరంగా బ్రేక్ ఈవెన్ రావడం అన్నది జరగలేదు. అటువంటి తరుణంలో మా సంస్థ నుంచి వచ్చిన ‘బెంగాల్ టైగర్’ ఈ రేర్ ఫీట్ ను ఎంతో ఈజీగా దక్కించుకోవడం నిర్మాతగా నాకు గర్వకారణం. ముఖ్యంగా సినిమాలకు "అన్ సీజన్"గా పేర్కొనే డిసెంబర్ నెలలో ఈ విధమైన భారీ కలెక్షన్స్ లభించడం రవితేజకు స్టార్ డమ్ కు నిదర్శనంగా నిలిచింది" అని అన్నారు.