తాప్సీతో రొమాన్స్ చేయనున్న భల్లలాదేవ

Posted: 11/06/2015 10:55 AM IST

‘బాహుబలి’ సినిమాతో ఒక్కసారిగా భారీ గుర్తింపును తెచ్చుకున్న ‘భల్లాలదేవ’ రానాకు వరుసగా ఆఫర్లు వచ్చిపడుతున్నాయి. ప్రస్తుతం వరుస బాలీవుడ్, టాలీవుడ్, కోలీవుడ్ సినిమాలతో బిజీగా వున్న రానాకు తాజాగా మరో బాలీవుడ్ సినిమా ఛాన్స్ వచ్చినట్లుగా తెలుస్తోంది.

1971లో ఇండియా-పాకిస్థాన్ ల మధ్య జరిగిన యుద్ధంలో విశాఖపట్నం సమీపం సముద్ర జలాల్లో మునిగిపోయిన పిఎన్ఎస్ ఘాజీ జలాంతర్గామి బ్యాక్ డ్రాప్ తో రూపొందనున్న తాజా చిత్రం ‘ఘాజీ’. తెలుగు, తమిళం, హిందీ భాషలలో ఒకేసారి తెరకెక్కుతున్న ఈ సినిమాలో రానా నావీ అధికారిగా కనిపించనున్నాడు.

సంకల్ప్ రెడ్డి ద్శకత్వంలో తెరకెక్కుతున్న ఈ సినిమాలో హీరోయిన్ పాత్ర కూడా చాలా కీలక కావడంతో.. చాలా మంది హీరోయిన్లను అనుకొని చివరకు తాప్సీని ఎంపిక చేసినట్లుగా తెలిసింది. గతంలో రానా, తాప్సీలు కలిసి ‘బేబీ’ అనే యాక్షన్ సినిమాలో నటించారు. ‘బేబీ’ తర్వాత మరోసారి వీరిద్దరూ ఈ ‘ఘాజీ’ సినిమాలో జతకట్టనున్నారు.

విశాఖ తీరంలో వున్న జలాంతర్గామిపై పాకిస్థాన్ సేనలు ఎలా దాడి చేయగలిగాయన్న మిస్టరీని వెండితెర మీద చూపించే ప్రయత్నం చేస్తున్నారు. మరి ఈ సినిమా ఎలా వుండబోతుందో త్వరలోనే తెలియనుంది.