రవితేజకి, మెగాహీరోకి డ్యాష్ డ్యాష్

Posted: 09/29/2015 01:33 PM IST

Raviteja bengal tiger varun tej kanche movie clash at boxoffice

మాస్ మహారాజా రవితేజ, మెగాహీరో వరుణ్ తేజ్ మధ్య క్లాష్ ఏర్పడనుంది. ప్రస్తుతం ఈ విషయం ఇండస్ట్రీలో హాట్ టాపిక్ గా మారింది. నిన్నటిదాకా సైలెంట్ గా వున్న వాతావరణం వారిరువురి క్లాష్ తో వయోలెంట్ గా మారనుందని అనుకుంటున్నారు. ఇంతకీ ఏ విషయంలో అనుకుంటున్నారా.. సినిమాల విషయంలో! ఆ ఇద్దరు హీరోలు నటించిన తాజా చిత్రాలు ఒకేసారి విడుదల కానున్నాయి. దీంతో వీరిద్దరి మధ్య నెలకొనే ఈ పోటీ చాలా ఆసక్తికరంగా వుంటుందని సినీ విశ్లేషకులు భావిస్తున్నారు.

రవితేజ్ హీరోగా సంపత్ నంది దర్శకత్వంలో ‘బెంగాల్ టైగర్’ సినిమా తెరకెక్కుతున్న విషయం తెలిసిందే! మాస్ ఎలిమెంట్స్ తో కూడిన కథా నేపథ్యంలో సాగే ఈ సినిమాలో తమన్నా, రాఖీ ఖన్నాలు హీరోయిన్లుగా నటిస్తున్నారు. ఈ సినిమాను నవంబర్ 7వ తేదీన విడుదల కానున్నట్లు సమాచారం. ఈ విషయాన్ని స్వయంగా రవితేజ తన ఫేస్ బుక్ ఖాతా ద్వారా వెల్లడించాడు. ఇక ఈ చిత్రం పాటలను అక్టోబర్ 17వ తేదీన విడుదల చేయనున్నట్లు యూనిట్ వర్గాలు తెలిపాయి. శ్రీ సత్యసాయి ఆర్ట్స్‌ పతాకంపై కేకే రాధామోహన్‌ భారీ వ్యయంతో ఈ చిత్రాన్ని నిర్మించారు. ‘కిక్-2’ సినిమా ఫ్లాప్ కావడంతో ఈ మూవీ కోసం రవితేజ చాలా కసరత్తు చేసినట్లు తెలుస్తోంది. పైగా.. అతనిలాగే బలమైన కథ వుండటంతో ఈ చిత్రం కచ్చితంగా భారీ విజయం సాధిస్తుందని భావిస్తున్నారు. గతంలో చెర్రీతో ‘రచ్చ’ సినిమా తీసి భారీ విజయం సాధించిన డైరెక్టర్ సంపత్ నంది ‘బెంగాల్ టైగర్’ ని తెరకెక్కించడంతో ఈ చిత్రంపై భారీ అంచనాలు నెలకొన్నాయి.

ఇక వరుణ్ తేజ్ హీరోగా క్రిష్ దర్శకత్వంలో ‘కంచె’ సినిమా తెరకెక్కుతున్న సంగతి విదితమే! రెండో ప్రపంచ యుద్ధం నేపథ్యంగా తెరకెక్కిన ఈ చిత్రంలో వరుణ్‌తేజ్‌ ఓ సైనికుడి పాత్రలో కనిపంచనున్నాడు. అప్పటి పరిస్థితులను, యుద్ధ సన్నివేశాలను తెరకెక్కించిందేందుకు చాలా శ్రమించాల్సి వచ్చిందని ఓ సందర్భంలో క్రిష్‌ చెప్పారు. ఫస్ట్‌ ఫ్రేమ్‌ ఎంటర్‌టైన్‌మెంట్స్‌ పతాకంపై సాయిబాబా, రాజీవ్‌రెడ్డి నిర్మిస్తున్న ఈ సినిమాకు చింతాన్‌భట్‌ సంగీతం అందించారు. ఇందులో ప్రగ్యా జైశ్వాల్‌ హీరోయిన్ గా నటించగా.. ‘చెన్నై ఎక్స్ ప్రెస్’ చిత్రంలో విలన్ గా నటించిన నికేతన్ ధీర్ ఇందులోనూ విలన్ గా నటిస్తున్నాడు. ఈ సినిమాను నవంబర్ 9వ తేదీన విడుదల చేయనున్నారు. ఇటీవలే విడుదలైన ట్రైలర్ కి భారీ రెస్పాన్స్ రావడంతో ఈ సినిమాపై భారీ అంచనాలు నెలకొన్నాయి. ఇలా భారీ అంచనాల నడుమ విడుదలవుతున్న ఈ రెండు సినిమాల మధ్య బాక్సాఫీస్ దగ్గర గట్టి పోటీ వుంటుందని అంటున్నారు.

AS