రెండేళ్ల తర్వాత ‘చుట్టాలబ్బాయి’తో ఆ డైరెక్టర్?

Posted: 06/11/2015 06:51 PM IST

సాయికుమార్ తనయుడు ఆది హీరోగా ఇండస్ట్రీలో తనకంటూ ప్రత్యేక గుర్తింపు తెచ్చకున్నాడు. ‘ప్రేమకావాలి’ చిత్రంతో వెండితెరకు పరిచయమైన ఆది.. ఆ తర్వాత ‘లవ్ లీ’ చిత్రంతో మంచి విజయాన్నే అందుకున్నాడు. యువహీరోల్లో మంచి ఫాలోయింగ్ నే సంపాదించుకోగలిగాడు. ప్రస్తుతం ‘గరం’ చిత్రం షూటింగ్ లో ఫుల్ బిజీగా వున్న ఈ నటుడు.. అప్పుడే మరో చిత్రం మొదలుపెట్టేశాడు. ఈసారి ఫ్యామిలీ ఆడియెన్స్ ని ఆకట్టుకోవడం కోసం ఈ యువహీరో ‘చుట్టాలబ్బాయి’గా ప్రేక్షకుల ముందుకు రానున్నాడు.

‘అహ నా పెళ్లంట’, ’పూలరంగుడు’, ‘భాయ్’ వంటి చిత్రాలను రూపొందించిన దర్శకుడు వీరభద్రంతో దర్శకత్వంలో ఆది ‘చుట్టాలబ్బాయి’ సినిమాలో నటిస్తున్నాడు. ఐశ్వర్య లక్ష్మి ఫిలింస్ పతాకంపై వెంకట్ తలారి ఈ చిత్రాన్ని నిర్మిస్తున్నారు. ఈ చిత్రం బుధవారం ఉదయం లాంఛనంగా ప్రారంభమైంది. త్వరలోనే షూటింగ్ ప్రారంభించనున్నారు. ఈ మూవీలో ఇంకా హీరోయిన్ ఎవరనే విషయాన్ని యూనిట్ బృందం ప్రకటించలేదు. ఈ చిత్రం కథ చాలా భిన్నంగానూ, సరికొత్తగానూ వుంటుందని యూనిట్ తెలుపుతోంది.

ఇక ‘భాయ్’తో భారీ పరాజయాన్ని మూటగట్టుకున్న దర్శకుడు వీరభద్రం.. ఈ చుట్టాలబ్బాయి చిత్రంపై చాలా ఆశలు పెట్టుకున్నాడు. మరి.. ఈ ‘చుట్టాలబ్బాయి’ ప్రేక్షకులను ఎలా మెప్పిస్తాడో తెలియాలంటే రిలీజ్ వరకు ఆగాల్సిందే!