సినీ పరిశ్రమ పెద్దోళ్లు హఠాత్తుగా మాయమైపోతున్నారు

Posted: 02/19/2015 02:02 PM IST

తెలుగు సినీ పరిశ్రమకు మార్గనిర్ధేశకులుగా, మార్గదర్శకులుగా నిలిచిన పెద్దలు హఠాత్తుగా.. మాయమైపోతున్నారని టాలీవుడ్ హాస్యనటుడు, రచయిత ఎల్బీ శ్రీరామ్ ఆవేదన వ్యక్తం చేశారు. రామానాయుడు భౌతికకాయానికి ఆయన గురువారం నివాళులు అర్పించారు. ఈ సందర్భంగా ఎల్బీ శ్రీరామ్ మాట్లాడుతూ.. ' కొత్తగా ఇండస్ట్రీకి  వచ్చే కొత్త దర్శకులకు, ఎంతో మందికి రామానాయుడు ఆశయం, ఆశ్రమం లాంటి వారని కోనియాడారు. నిర్మాతలకు దారి దీపం, ఎంతో ఎత్తుకు ఎదగాలనుకునే వారికి ఆయన చేయూతనిందించే ఎవరెస్ట్ శిఖరమన్నారు.

తనను సినిమా రంగంలో నిలబెట్టింది ఈవీవీ సత్యనారాయణ అయితే.. ఈవీవీ సత్యనారాయణను నిలబెట్టింది మాత్రం రామానాయుడు అని అన్నారు. ఎప్పటికైనా అందరూ పైకి వెళ్లిపోవాల్సిన వాళ్లే అయితే ఇలా సినీ పరిశ్రమకు చెందిన పెద్ద పెద్దవాళ్ళు అంతా హఠాత్తుగా మాయం అయిపోతుంటే సినిమా రంగం అనే పాఠశాల.. ఉపాధ్యాయులు లేని విద్యార్థులుగా మారుపోతోందని ఆయన కన్నీళ్ల పర్యంతమయ్యారు. రామానాయుడి సినిమాల్లో తాను చాలా మంచి మంచి వేషాలు వేశానని గుర్తు చేసుకున్నారు.  షూటింగ్ లో భాగంగా తాను పలు విధేశాలకు వెళ్లగలిగానంటే రామానాయుడు చిత్రాలలో నటించడం ద్వారానేనన్నారు. ఆయనకు శ్రద్ధాంజలి' అని అన్నారు.

జి మనోహర్