కొచ్చాడయాన్ టీజర్ వచ్చేస్తుంది

Posted: 09/02/2013 05:10 PM IST

‘రోబో ’ చిత్రం తరువాత నుండి ఇంత వరకు ప్రేక్షకుల ముందుకు రాని సూపర్ స్టార్ రజినీకాంత్ ప్రస్తుతం తన కూతురు దర్శకత్వంలో భారీ బడ్జెట్ తో రూపొందిస్తున్న ‘కొచ్చాడయాన్ ’ సినిమాలో నటిస్తున్న సంగతి తెలిసిందే. ఈ చిత్రం షూటింగు ఎప్పడో ప్రారంభం అయినా, ఇంత వరకు విడుదలకు నోచుకోలేదు. దీనికి కారణం నిర్మాణంత కార్యక్రమాలే. ఎక్కువ శాతం గ్రాఫిక్స్ తోనే తెరకెక్కుతున్న ఈ చిత్రం విడుదల కోసం రజినీ అభిమానులే కాకుండా యావత్ సినీ లోకం ఎంతో ఆసక్తిగా ఎదురు చూస్తుంది. ఈ చిత్రానికి సంబంధించిన తొలి టీజర్ ను ఈనెల 9న విడుదల చేయడానికి సన్నాహాలు చేస్తున్నారు. మోషన్ కేప్చర్ టెక్నాలజీతో తెరకెక్కుతున్న తొలి భారతీయ చిత్రంగా రికార్డుకెక్కనున్న ఈ చిత్రం టీజర్ ఎలా ఉండబోతుందోనన్న ఆసక్తిలో ప్రేక్షకులు ఉన్నారు. ఈ చిత్రంలో రజనీకాంత్ తండ్రీకొడుకులుగా ద్విపాత్రాభినయం చేస్తున్నాడు. తండ్రి సరసన  శోభన, కొడుకు సరసన దీపికా పదుకొనే కథానాయికలుగా నటిస్తున్నారు. తమిళంతో బాటు పలు భాషల్లో దీనిని డబ్ చేస్తున్నారు. తెలుగులో 'విక్రం సింహా' పేరిట రిలీజ్ అవుతుంది.