Posted: 09/27/2012 04:18 PM IST

ప్రస్తుత రోజుల్లో సినిమా ఏదైనా ఐటంసాంగ్ అనేది దానికి ఆయువు పట్టుగా మారిపోయింది. ఇక ఐటంసాంగ్ ఏదైనా అది దేవిశ్రీ ప్రసాద్ స్వరకల్పనలో నుంచి జలపాతంలా దూకవలసిందే అనేది అలవాటుగా మారిపోయింది. ఇప్పుడిదే తరహాలో ఆయన 'ఎవడు' చిత్రం కోసం ఓ ఐటంసాంగ్ ను కంపోజ్ చేశాడు. రామ్ చరణ్ హీరోగా వంశీ పైడిపల్లి ఈ సినిమాను తెరకెక్కిస్తోన్న సంగతి తెలిసిందే. ఈ సినిమా కోసం దేవిశ్రీ '' గాజువాక సెంటర్లో అయ్యో పాపం'' అనే ఐటంసాంగును సిద్ధం చేశాడు.  'గబ్బర్ సింగ్' చిత్రంలో 'కెవ్వు కేక' అనే పాటలో ఆ మాట ప్రతి పాదం చివరన మాంచి ఊపుతో వస్తుంది. అలాగే ఈ పాటలో ప్రతి పాదం చివరన 'అయ్యోపాపం' అని వస్తుందట. ఈ ఐటంసాంగును ఏ మెరుపు తీగ పై చిత్రీకరిస్తారో తెలియదుగానీ, పాట మాత్రం చరణ్ కి ఎంతగానో నచ్చిందని అంటున్నారు. అద్భుతంగా వచ్చిన ఈ ఐటంసాంగుని అనూహ్యమైన స్థాయిలో తెర కెక్కించ డానికి వంశీ పైడిపల్లి సన్నాహాలు చేస్తున్నాడట. భారీ బడ్జెట్టుతో నిర్మితమౌతోన్న ఈ సినిమాలో సమంతా - అమీ జాక్సన్ కథానాయికలుగా అలరించనున్నారు.
     మరోవైపు రామ్ చరణ్, వీవీ వినాయక్ కాంబినేషన్లో రూపొందుతున్న 'నాయక్' సినిమా షూటింగు ప్రస్తుతం హైదరాబాదులోని రామోజీ ఫిలిం సిటీలో జరుగుతోంది. చరణ్, అమలాపాల్, మరి కొంతమంది ప్రధాన తారాగణంపై ముఖ్య సన్నివేశాలను చిత్రీకరిస్తున్నారు. ఇటీవలే మొదలైన ఈ షెడ్యూలు అక్టోబర్ 10 వరకు హైదరాబాదు పరిసరాల్లో జరుగుతుంది. కాగా, గత నెలలో ఈ చిత్రానికి సంబంధించిన షూటింగు ఐస్ ల్యాండ్, స్లోవేనియాలలో జరిగింది. చరణ్, కాజల్, అమలాపాల్ లపై కొన్ని పాటలను, సన్నివేశాలను అక్కడ షూట్ చేశారు. చరణ్ ద్విపాత్రాభినయం చేస్తున్న ఈ చిత్రాన్ని వచ్చే సంక్రాంతికి విడుదల చేయడానికి ప్లాన్ చేస్తున్నారు. తమన్ దీనికి సంగీతాన్ని అందిస్తున్నాడు.       

...avnk