Posted: 08/26/2012 09:13 PM IST

       ప్రముఖ బాలీవుడ్ క్యారెక్టర్ నటుడు ఏ.కె.హంగల్ ఈ రోజు ఉదయం మరణించారు. తొడ ఎముక విరగడంతో గత కొన్నాళ్ళుగా ఆయన ముంబయ్, శాంతాక్రాజ్ లోని ఆశా పరేఖ్ ఆసుపత్రిలో ఆయన చికిత్స పొందుతున్నారు. రెండు ఊపిరితిత్తులలోనూ ఒకటి పూర్తిగా దెబ్బతినడంతో, వెంటిలేటర్స్ మీద వుండి, ఈ ఉదయం శాశ్వతంగా ఈ లోకం నుంచి సెలవు తీసుకున్నారు. 95 సంవత్సరాల హంగల్ పూర్తి పేరు అవతార్ కిషన్ హంగల్. కాశ్మీరీ బ్రాహ్మణ కుటుంబానికి చెందిన హంగల్ బాల్యం ఇప్పటి పాకిస్తాన్ లోని పెషావర్ లో గడిచింది. మొదట్లో టైలరింగు వృత్తిని జీవనాధారంగా చేసుకున్న హంగల్, రంగస్థలంపై పలు పాత్రలు పోషించి మంచి నటుడిగా పేరు తెచ్చుకున్నారు. దేశ విభజన తర్వాత 1949 లో ఆయన ముంబయ్ నగరానికి వలస వచ్చేశారు. బలరాజ్ సహానీ, కైఫీ ఆజ్మీ వంటి మహామహులతో కలిసి ఆయన రంగస్థలంపై పలు ప్రయోగాలు చేశారు.
    విశేషం ఏమిటంటే, వెండితెరకు ఆయన చాలా ఆలస్యంగా వచ్చారు. సుమారు ఏభై ఏళ్ల వయసులో తొలిసారిగా బాసు భట్టాచార్య రూపొందించిన 'తీస్రీ కసం' (1966) సినిమా ద్వారా కెరీర్ ప్రారంభించారు. హీరో, హీరోయిన్లకు తండ్రిగా, అంకుల్ గా పలు పాత్రలు పోషిస్తూ వచ్చారు. నమక్ హరాం, శౌకీన్, షోలే, ఆయినా, అవతార్, అర్జున్, తపస్య, కోరా కాగాజ్, బావార్చి, చిత్ చోర్, గుడ్డి వంటి పలు సినిమాలలో ఆయన పోషించిన పలు క్యారెక్టర్లు ప్రేక్షకులకు కలకాలం గుర్తుండిపోతాయి. భారత సినిమా రంగానికి ఆయన చేసిన సేవలకు గాను ప్రభుత్వం ఆయనను పద్మ భూషణ్ బిరుదుతో సత్కరించింది. అయితే, జీవిత చరమాంకంలో హంగల్ నానా ఇబ్బందులూ పడ్డారు. భార్య ఎప్పుడో పోయింది. ఉన్న ఒక్క కొడుకూ విజయ్ కూడా 75 ఏళ్ల వృద్ధాప్యంలో వున్నాడు. ఆయనకు కూడా భార్య, పిల్లలూ లేరు. సంపాదన లేదు. దీంతో ఈ తండ్రీ కొడుకులకు రోజు గడవడానికే కష్టమైంది. పైగా, మందుల ఖర్చు. కొన్నాళ్ల క్రితం వీరి దీన స్థితిని మీడియా వెలుగులోకి తేవడంతో, హంగల్ ఆసుపత్రి ఖర్చులను భరించడానికి అమితాబ్ దంపతులు ముందుకొచ్చారు. అలాగే, ఆర్టిస్టు యూనియన్ కూడా ఆర్ధిక సాయం చేసింది. వ్యక్తిగతంగా సల్మాన్ ఖాన్, అమీర్ ఖాన్ ఎంతగానో ఆదుకున్నారు

...avnk