Posted: 08/03/2012 01:37 PM IST

       ఆర్‌ఎస్‌ ఇన్‌ఫోటైన్‌మెంట్‌ బేనర్‌పై ఎల్రెడ్‌కుమార్‌ దర్శకత్వంలో తమిళంలో హిట్‌ అయిన ఓ చిత్రాన్ని మెగా సూపర్‌గుడ్‌ ఫిలింస్‌ సమర్పణలో ఎల్రెడ్‌కుమార్‌, జయరామరెడ్డిలు 'నిరంతరం నీ ఊహలే' పేరుతో తెలుగులో అనువదిస్తున్నారు. అథర్వా మురళి, అమలాపాల్‌ జంటగా నటిస్తున్నారు. జివి ప్రకాష్‌ సంగీతాన్ని అందించారు. ఈ ఆడియో రాత్రి హైదరాబాద్‌లో విడులైంది. వర్థమాన హీరో నాని ఆడియోను విడుదలచేసి మరో హీరో సునీల్‌కు అందించారు.
      ఈ సందర్భంగా చిత్రం బ్రుందంతోపాటు పలువురు తమ అభిప్రాయాలు వెలిబుచ్చారు. హీరో నాని మాట్లాడుతూ నాకు ఇష్టమైన బేనర్‌ సూపర్‌గుడ్‌. 'భీమిలి కబడ్డీ జట్టు' వంటి హిట్‌ చిత్రాన్ని ఇచ్చారు. ఈ సినిమాలో ట్రైలర్స్‌, సాంగ్స్‌ సూపర్బ్‌ గా ఉన్నాయి. జెండాపై కపిరాజు అనే నా చిత్రానికి కూడా ప్రకాష్‌ సంగీతాన్ని అందిస్తున్నారు. ఈ పాటలు విన్నాక మంచి సంగీతం ఇస్తారని నమ్మకం కల్గిందని చెప్పారు. సంగీతదర్శకుడు ప్రకాష్‌ మాట్లాడుతూ, వనమాలి సాహిత్యంతో పాటలన్నీ బాగున్నాయి. రీరికార్డింగ్‌ బాగా కుదిరింది. మంచి సక్సెస్‌కావాలని కోరుకుంటున్నానని అన్నారు.
        సునీల్‌ మాట్లాడుతూ, ఈ సినిమాలో పాటలతోపాటు హీరో అథర్వా మురళి డాన్స్‌ అద్భుతంగాఉంది. తెలుగు పరిశ్రమలో అతనికి మంచి స్థానం ఏర్పడుతుందని అన్నారు. హీరో మురళి మాట్లాడుతూ హీరోగా నాకిది రెండవ చిత్రం. జీవీ ప్రకాష్‌ చక్కటి సంగీతం ఇచ్చారు. మెగా సూపర్‌గుడ్‌ ఫిలింస్‌ ఈ చిత్రాన్ని తెలుగులో విడుదలచేయడం ఆనందంగా ఉంది అన్నారు. దర్శకుడు మాట్లాడుతూ, మా బేనర్‌లో వచ్చిన రంగం చిత్రాన్ని ఆర్‌బి చౌదరి తెలుగులో విడుదలచేశారు. ఈ చిత్రం కూడా అదే బేనర్‌లో విడుదల కావడం ఆనందంగా ఉంది. ఈచిత్రానికి సంగీతం బ్యాక్‌బోన్‌గా నిలుస్తుంది. తమిళ వర్షన్‌కు, తెలుగుకు స్క్రీన్‌ప్లే చాలా డిఫరెంట్‌గా ఉంటుంది. ఇక్కడా మంచి హిట్‌ అవుతుందనే నమ్మకముందని తెలిపారు.

...avnk