Posted: 07/24/2012 07:02 PM IST

        తన ఈగతో దక్షిణ భారత సినిమా చూపు తన వైపు తిప్పుకున్న దీశాలి రాజమౌళి. తాజాగా ఆయన  రూపొందించిన 'ఈగ' సినిమా సూపర్ హిట్ కావడంతో, గతంలో ఆయన దర్శకత్వం వహించిన చిత్రాలకు ఇప్పుడు ఇతర భాషల్లో మంచి డిమాండ్ ఏర్పడింది. ముఖ్యంగా తమిళంలో ఆయన చిత్రాలను డబ్ చేయడం మొదలెట్టారు. అలా ఏడేళ్ల క్రితం ప్రభాస్, శ్రియా జంటగా రాజమౌళి డైరెక్ట్ చేసిన 'ఛత్రపతి' చిత్రాన్ని ఇప్పుడు తమిళంలోకి 'చంద్రమౌళి' పేరుతో అనువదిస్తున్నారు. సతీష్ అనే తమిళ నిర్మాత ఈ 'ఛత్రపతి' సినిమా హక్కుల్ని తీసుకున్నారు. ప్రస్తుతం డబ్బింగ్ పనులు నిర్వహిస్తున్నారు. సెప్టెంబర్లో ఈ 'చంద్రమౌళి' చిత్రాన్ని విడుదల చేయడానికి సన్నాహాలు చేస్తున్నారు. ఇదిలా ఉంటే.. 'ఈగ' సినిమాని హిందీలో కూడా విడుదల చేసేందుకు సన్నాహాలు చేస్తున్నారు. అయితే ఒరిజినల్ వెర్షన్ కి కొద్దిగా మార్పులు చేసే అవకాశం కనిపిస్తోంది. నాని పాత్రలో ప్రముఖ బాలీవుడ్ కథానాయకుడిని తీసుకుంటే ఈ సినిమా మరింత ఊపుతో ముందుకి వెళుతుందని దర్శక నిర్మాతలు భావిస్తున్నారు. ఈ నేపథ్యంలో సుదీప్ - సమంతా పాత్రలను అలాగే ఉంచి, నాని పాత్రని మాత్రం రీషూట్ చేసేందుకు రంగాన్ని సిద్ధం చేశారు. ఈ పాత్రలో అభిషేక్ బచ్చన్ నటించే అవకాశముందని అంటున్నారు. అదే నిజమైతే, ఈ చిత్రం అక్కడ 3D వెర్షన్లో విడుదలై, జాతీయ స్థాయిలో రాజమౌళి పేరు మారుమ్రోగటం ఖాయమని సినీ పండితులు భావిస్తున్నారు.

...avnk