Posted: 07/24/2012 06:07 PM IST

       పవర్ స్టార్ పవన్ కల్యాణ్ బాలీవుడ్ ఎంట్రీకి రంగం సిద్ధమైంది. గబ్బర్ సింగ్ సూపర్ డూపర్ హిట్ అయిన నేపథ్యంలో దర్శక నిర్మాతలంతా పవన్ వైపే చూస్తున్నారు. ఈ తరుణంలో  కొండా కృష్ణంరాజు నిర్మించబోతోన్న చిత్రం ద్వారా పవన్ బాలీవుడ్ తెరకి పరిచయం కానున్నారు. ఈ విషయాన్ని నిర్మాత ఈ రోజు ధృవీకరిస్తూ, పవన్ కల్యాణ్ ని బాలీవుడ్ కి పరిచయం చేసే అవకాశం తనకి దక్కడం తన అదృష్టమని ప్రెస్ నోట్ రిలీజ్ చేశారు. అంతేకాదు తెలుగు - హిందీ భాషల్లో తెరకెక్కిస్తోన్న ఈ సినిమా, అక్టోబర్ నుంచి షూటింగ్ జరుపుకుంటుందని అన్నారు. పవన్ కల్యాణ్ బాడీ లాంగ్వేజ్ కి తగినట్టుగా ... ఆయన అభిమానుల అంచనాలని అందుకునేలా ఈ సినిమా ఉంటుందనీ ... ఈ చిత్రానికి సంబంధించిన పూర్తి వివరాలను త్వరలోనే వెల్లడిస్తామని చెప్పారు.
     కాగా, గతంలో పవన్ కల్యాణ్ ప్రధాన పాత్ర ధారిగా కొండా కృష్ణంరాజు ''ప్రిన్స్ ఆఫ్ పీస్' అనే చిత్రాన్ని ప్రారంభించారు. జీసెస్ జీవితానికి సంబంధించిన ఈ సినిమా, అనివార్య కారణాల వల్ల అప్పట్లో మధ్యలోనే ఆగిపోయింది. ఆ తరువాత వాళ్ళిద్దరి కాంబినేషన్లో ఇప్పుడీ సినిమాని ప్రకటించడం అందరిలోనూ ఆసక్తిని రేకెత్తిస్తోంది. భారీస్థాయిలో జరుగుతోన్న పవన్ బాలీవుడ్ ఎంట్రీ ఎలాంటి ఫలితాలను ఇస్తుందనేది వేచి చూడాలి. 
     ఇదిలా ఉంటే, టాలీవుడ్ లో హీరోయిన్లే కాకుండా ప్రస్తుతం హీరోలు కూడా హిందీరంగంలో అడుగుపెడుతున్నారు. ఇప్పటికే రానా హిందీ ప్రేక్షకులకు పరిచయం అయితే యువ హీరో రామ్ చరణ్ జంజీర్ తో ఎంట్రీ ఇస్తున్నాడు. తాజాగా మన గబ్బర్‌సింగ్‌ ఈ ద్విభాషా చిత్రంలో నటించనున్నాడు. ఇంకా పేరు పెట్టని ఈ సినిమా అక్టోబర్‌ నుంచి సెట్స్‌ మీదకు వెళ్లనుందని సమాచారం. పవన్‌ కళ్యాణ్‌ సరసన నటించే ఛాన్సు ఏ కథానాయికి లభిస్తుందో తెలియాలంటే అభిమానులు మరికొద్ది రోజులు వేచి చూడాల్సిందే.

....avnk