Posted: 07/24/2012 02:53 PM IST

       బ్రహ్మానందం టైటిల్‌ పాత్రలో హాస్య ప్రధానంగా 'గజదొంగ' చిత్రాన్ని రూపొందిస్తున్నారు. చైతన్య నెల్లి, ప్రకృతి యువ జంట కాగా ఆర్‌.ఎస్‌.సురేష్‌ దర్శకత్వం వహిస్తున్నారు. భవాని మూవీస్‌ పతాకంపై యు.శ్రీనివాసరావు నిర్మిస్తున్న ఈ చిత్రం షూటింగ్‌ ప్రారంభోత్సవం హైదరాబాద్‌లోని రామానాయుడు స్టూడియోస్‌లో జరిగింది. ముహూర్తపు సన్నివేశానికి వైజాగ్‌ సత్యనారాయణ క్లాప్‌ నివ్వగా, మరుదూరి రాజా కెమెరా స్విచ్చాన్‌ చేశారు. దర్శకుడు సురేష్‌ మీడియాతో ముచ్చటించారు. 'దర్శకుడిగా నాకిది తొలి చిత్రం. హాస్య నేపథ్య కథ ఇది. ఇందులో బ్రహ్మానందం చాలా కీలక పాత్రను పోషిస్తున్నారు. మూడు షెడ్యూల్స్‌ లో చిత్రాన్ని పూర్తిచేస్తాం' అని చెప్పారు. నిర్మాత శ్రీనివాసరావు మాట్లాడుతూ, 'బ్రహ్మానందం, అలీ, ఎం.ఎస్‌.నారాయణ వంటివారితో హాస్య సినిమా చెయ్యాలన్న నా తృష్ణను ఈ చిత్రం ద్వారా నెరవేర్చుకుంటున్నాను. బ్రహ్మానందం చుట్టూ తిరిగే కథ ఇది' అని అన్నారు. ఈ చిత్రంలో తనకు అవకాశం లభించడం పట్ల చైతన్య ఆనందాన్ని వ్యక్తంచేయగా, తనకిది రెండవ చిత్రమని నటి ప్రకృతి తెలిపారు.  రచయిత మరుదూరి రాజా మాట్లాడుతూ, చిన్న చిత్రాలకు పనిచేయడమంటే తనకెంతో ఇష్టమని అంటూ ఇద్దరు ప్రేమికులు ఒకటయ్యేందుకు గజదొంగ ఏ విధంగా సాయపడ్డాడన్నదే ఈ చిత్ర ప్రధానాంశం. రెండున్నర గంటల పాటు ప్రేక్షకులకు వినోదాన్ని పంచుతుంది' అని అన్నారు.
       ఇంకా ఈ చిత్రంలో అలీ, జీవా, రఘుబాబు, ఎం.ఎస్‌.నారాయణ, చిత్రం శ్రీను, కొండవలస, తాగుబోతు రమేష్‌, ధనరాజ్‌, శివన్నారాయణ, నామాల మూర్తి, రాజ్యలక్ష్మి, లక్ష్మి, ప్రియ, మధుబాబు తదితరులు తారాగణం. కాగా,  సంగీతం: ఆది, ఛాయాగ్రహణం: రాహుల్‌, ఆర్ట్‌: గోవిందు, ఎడిటింగ్‌: ఉపేంద్ర, సహ నిర్మాత: బొడ్డు నాగేశ్వరరావు, స్క్రీన్‌ప్లే, దర్శకత్వం: ఆర్‌.ఎస్‌.సురేష్‌.

...avnk