Posted: 04/18/2012 05:48 PM IST

                   దర్శక రత్న దాసరి ఏ మాట మాట్లాడినా సంచలనం గానే ఉంటుంది. చాలా కాలంగా సమకాలీన సామాజిక పరిస్థితుల పట్ల, స్పందిస్తూ సినిమాలు తీయడం దాసరి నారాయాణ రావుకి అలవాటే. అయితే, అలాంటి చిత్రాలు ఏ సమయంలో తీయాలో కూడా ఆయనకు బాగా తెలుసు. ఇప్పుడిదే కోవలో ఆయన మరో రాజకీయ వ్యంగాస్త్రాన్ని సంధించడానికి సన్నద్ధమౌతున్నారు.
               ఇటీవల కాలంలో చోటు చేసుకుంటున్న రాష్ట్ర రాజకీయాలను, నాయకుల మధ్య కుమ్ములాటను ఎండగడుతూ ఆయన 'అసెంబ్లీలో దొంగలు పడ్డారు' అనే చిత్రాన్ని తెరకెక్కించనున్నారు. ఈ సినిమాకి సంబంధించిన కథా చర్చలు హైదరాబాద్ లోని ఆయన ఫాంహౌస్ లో రహస్యంగా జరుగుతున్నట్టు తెలుస్తోంది.  అధికార పార్టీకి సంబంధించిన వ్యక్తిగా ఉంటూ ఆయన ఈ సినిమాకి 'అసెంబ్లీలో దొంగలు పడ్డారు' అనే టైటిల్  పెట్టడం దుమారాన్ని రేకెత్తిస్తోంది.
                దాసరి.. ఈ రాజకీయ వ్యంగాస్త్రాన్ని సంధించేది రాజకీయ పార్టీలపైనా? రాజకీయ ప్రత్యర్ధుల మీదా? అనే సందేహం అందరిలోనూ తలెత్తుతోంది. గతంలో పొలిటికల్ సెటైర్స్ గా వచ్చిన ఆయన సినిమాలను పరిశీలిస్తే ... అవి రాజకీయ ప్రత్యర్ధులని టార్గెట్ చేసుకుని తెరకెక్కినవే అనే సంగతి స్పష్టమౌతుంది. కాబట్టి ఈ సినిమాలో కాంగ్రెస్ పార్టీలో పీఆర్పీ విలీనం, అనంతరం చిరంజీవి అడుగులు ప్రధాన కథాంశంగా కనిపించే అవకాశాలు ఉన్నాయనే ప్రచారం ఫిల్మ్ నగర్ సమాచారం. మొత్తంగా  ఈ సినిమాను దర్శక రత్న దాసరి ఎలా రక్తి కట్టించబోతున్నారనే దానిపై సినీ వర్గాల్లోనే కాదు..అటు రాజకీయ వర్గాల్లోనూ చర్చనీయాంశమైంది.

...avnk