ఫాక్స్‌కాన్‌ మేక్ ఇన్ ఏపీ.. 10న సీఎం చేతులమీదుగా అవిష్కరణ

Posted: 08/08/2015 03:22 PM IST

చైనా అఫిల్ సంస్థగా ప్రఖ్యాతి చెందిన జియోమీ ఆంధ్రప్రదేశ్‌లోనూ సెల్‌ఫోన్లను ఉత్పత్తి చేస్తోంది. ఆన్‌లైన్‌ విక్రయాల్లోనూ పైచేయి సాధించిన జియోమీ సంస్థ ‘మేక్‌ ఇన్‌ ఆంధ్రా’ అంటూ ఏపీలో తన ఉత్సత్తులను ప్రారంభించనుంది. ఆంధ్రాలో ఉత్పత్తి అయిన జియోమీ ఫోన్లను ఈ నెల పదో తేదీన విశాఖపట్నంలో ముఖ్యమంత్రి చంద్రబాబు ఆవిష్కరించనున్నారు. చిత్తూరు జిల్లాలోని శ్రీసిటీలో ఈ కంపెనీ తన సెల్‌ఫోన్లను తయారు చేయిస్తోంది. తైవాన్‌కు చెందిన ప్రసిద్ధ సెల్‌ఫోన్ల తయారీ సంస్థ ఫాక్స్‌కాన్‌ శ్రీసిటీ సెజ్‌లో ఫోన్ల తయారీ కర్మాగారాన్ని ఏర్పాటు చేసింది.
 
ఫాక్స్‌కాన్‌ కంపెనీ కర్మాగారంలోనే జియోమీ కంపెనీ తన ఫోన్లను తయారు చేయించుకొంటోంది. ప్రస్తుతం ఇక్కడ నెలకు 50 వేల ఫోన్లను తయారు చేస్తున్నారు. వచ్చే మార్చి నాటికి 50 లక్షల ఫోన్లను తయారు చేసే స్థాయికి కర్మాగారాన్ని విస్తరించాలని ఫాక్స్‌కాన్‌ నిర్ణయించింది. ఆంధ్రప్రదేశ్‌ రాష్ట్రంలో సెల్‌ఫోన్లు తయారు చేసే మొట్టమొదటి కర్మాగారం ఇదే కావడం విశేషం. ఇప్పటి వరకు ఏపీలో హార్డ్‌వేర్‌ తయారీ పరిశ్రమ లేదు. కొత్త రాష్ట్రం ఏర్పడిన తర్వాత ఫాక్స్‌కాన్‌ వచ్చి తన ప్లాంటును పెట్టింది. ఇది ప్రతిష్ఠాత్మక ఉత్పత్తి కావడంతో ఈ ఫోన్ల ఆవిష్కరణ కార్యక్రమాన్ని విశాఖలో పెట్టారు. కాగా అటు తెలంగాణాలోనూ సెల్ కాన్ మొబైల్ సంస్థ తన ఉత్పత్తులతో దూసుకుపోతున్న విషయం తెలిసిందే.

జి. మనోహర్