Posted: 08/09/2012 03:10 PM IST

ఇంటర్నెట్ సెర్చి ఇంజిన్ గూగుల్‌లో విద్యాపరమైన విషయాల అన్వేషణకు సంబంధించి భారత్ రెండో స్థానంలో నిల్చింది. 2008లో 8వ స్థానంలో ఉన్న ఇండియా ప్రస్తుతం అమెరికా తర్వాత స్థానాన్ని దక్కించుకుంది.  ఇంటర్నెట్ అందుబాటులో ఉన్న వారిలో.. 60 శాతం మంది భారతీయ విద్యార్థులు వివిధ కోర్సులు, విద్యాసంస్థల సమాచారం గురించి తెలుసుకోవడానికి ముందుగా గూగుల్‌నే ఎంచుకుంటున్నారు. గూగుల్ ఇండియా జరిపిన ‘స్టూడెంట్స్ ఆన్ వెబ్’ అధ్యయనంలో ఈ విషయాలు వెల్లడయ్యాయి. 6 కోట్ల మంది పైగా ఇంటర్నెట్ యూజర్లు 18-35 ఏళ్ల మధ్యలో ఉన్నవారు కావడంతో విద్యా సంబంధమైన విషయాల గురించి అన్వేషణ విస్తృతంగా ఉంటోందని గూగుల్ ఇండియా వైస్ ప్రెసిడెంట్ రాజన్ ఆనందన్ చెప్పారు. ఏటా ఇది 46% పైగా పెరుగుతోందని ఆయన వివరించారు.