హర్ హర్ మోదీ కాదు డర్ డర్ మోదీ అంటున్న కాంగ్రెస్

Posted: 04/15/2014 05:03 PM IST

ఎన్నికల ప్రచారంలో నిజానికి చెయ్యవలసింది తమ పార్టీ సిద్ధాంతాలను ప్రజలకు తెలియజేయటం, గతంలో తప్పులు చేస్తే వాటిని ఒప్పుకుని సవరించుకుంటామని మాటివ్వటం, భవిష్యత్తులో ఏం చేస్తారన్నది చెప్పటం చెయ్యాలి కానీ, ఎదుటివారిని చిన్నగా చూపటం వలన కూడా పోలికలో వీళ్లు పెద్దవాళ్ళవుతారు కాబట్టి మాటకు మాట పెంచుకుంటూ పోవటం జరుగుతోంది. 

ఈ వ్యవహారం ప్రధానంగా జాతీయ పార్టీలైన కాంగ్రెస్, భాజపాల మధ్య జరుగుతోంది.  పార్టీ సిద్ధాంతాలు, లోగడ వాళ్ళు చేసిన పనులు ఇలాంటివాటిని ఎవరికి వారు కాక అవతలివారి గురించి, ముఖ్యంగా ప్రధానమంత్రి అభ్యర్థుల గురించి వ్యాఖ్యానించటం జరుగుతోంది.

అందులో భాగంగా కాంగ్రెస్ వణికిపోతోంది అని మోదీ అంటే, ఔను నియంత కదా అందుకే భయంతో వణికిపోతున్నామని కాంగ్రెస్ అధికార ప్రతినిధి అభిషేక్ సింఘ్వి అన్నారు.  ఎన్నికల తర్వాత కాంగ్రెస్ నాయకులు చేసిన అపరాధాలకు దండన ఉంటుందని అన్న మోదీని నియంత అన్నారు సింఘ్వి. 

అందువలన మోదీ అభిమానులు పఠించిన హర్ హర్ మోదీ మంత్రాన్ని వెక్కిరిస్తూ డర్ డర్ మోదీ గా మార్చారు.

హర్ హర్ మోదీ అని ఉపయోగించటానికి మోదీ అప్పుడే వారించారు.  కానీ అది ఇప్పుడు వెక్కిరింతకు ఉపయోగపడింది.

-శ్రీజ