అలర్ట్ : 22, 23 తేదీల్లో తెలంగాణలో భారీ వర్షాలు.. హచ్చరించిన ఐఎండి

Posted: 07/20/2021 12:18 PM IST

Telangana rain alert imd issues orange alert for next 3 days

గత కొన్ని రోజులుగా తెలంగాణలో విస్తారంగా వర్షాలు పడుతున్నాయి. ఎడతెరిపి లేకుండా కురుస్తున్న వార్షాలకు రాష్ట్రవ్యాప్తంగా చెరువులు నిండుకుండలను తలపిస్తున్నాయి. రాష్ట్రంలోని వాగులు, వంకలు పొంగిపొర్లుతున్నాయి. కుండపోతలా కురుస్తున్న వర్షాలతో రాష్ట్రంలోని అనేక ప్రాంతాల్లోని పంటలకు అపారనష్టం వాటిల్లింది. చేతికందాల్సిన పంట అనేక ప్రాంతాల్లో నీట మునిగింది. ఇదిలావుండగా, ఇప్పటికే తడిసిముద్దైన రాష్ట్రాన్ని మరిన్ని వానలు కురువనున్నాయని వాతావరణ కేంద్రం తెలపింది.

రాష్ట్రంలో ఈ నెల 22, 23వ తేదీల్లో భారీ నుంచి అతి భారీ వర్షాలు కురిసే అవకాశం ఉందని భారత వాతావరణ శాఖ తెలిపింది. వీటి ప్రభావం మరీ ముఖ్యంగా మెదక్, సంగారెడ్డి జిల్లాలతో పాటు ఇటు హైదరాబాద్ నగరంతో పాటు యాదాద్రి జిల్లాపై పడే అవకాశం ఉందని పేర్కొంది. ఈ జిల్లాల్లో వర్షాలతో పాటు పిడుగులు కూడా పడే అవకాశాలు వున్నాయని అధికారులు తెలిపారు. దీంతో హైదరాబాద్ వాతావరణ శాఖ జిల్లావాసులకు హెచ్చరికలు జారీ చేసింది. బయటకు వెళ్లేవారు తప్పనిసరిగా జాగ్రత్తలు తీసుకోవాలని సూచించింది.

రాష్ట్రమంతటా ఉరుములు, మెరుపులతో కూడిన వర్షాలు పడతాయని, హైదరాబాద్‌తోపాటు ఇతర ప్రాంతాల్లో ఓ మోస్తరు వర్షాలు పడతాయని అధికారులు తెలిపారు. గత నెల 1 నుంచి నిన్నటి వరకు (19వ తేదీ) 258.1 మిల్లీమీటర్ల వర్షపాతం నమోదు కావాల్సి ఉండగా ఏకంగా 409.9 మిల్లీమీటర్ల వర్షపాతం నమోదు కావడం గమనార్హం. అత్యధికంగా యాదాద్రి జిల్లాలో 178 శాతం వర్షపాతం నమోదైంది. ఇక, ఆదివారం ఉదయం నుంచి సోమవారం ఉదయం వరకు రాష్ట్రవ్యాప్తంగా వర్షాలు పడగా, వికారాబాద్ జిల్లా బొంరాసిపేట మండలం దుడ్యాలలో గరిష్ఠంగా 8 సెంటీమీటర్ల వర్షపాతం కురిసింది.