డొమినికాలో పట్టుబడ్డ ఆర్థిక నేరస్థుడు ముఖుల్ చోక్సీ..

Posted: 05/27/2021 11:50 AM IST

పంజాబ్ నేషనల్ బ్యాంకు (పీఎన్‌బీ) కుంభకోణం కేసు నిందితుడు, వేల కోట్ల రూపాయల ప్రజాధనంతో విదేశాలకు పారిపోయిన ఆర్థిక నేరస్థుడు, అవతారమెత్తిన వజ్రాల వ్యాపారి మెహుల్ చోక్సీ (61) మరోమారు పారిపోయిన విషయం తెలిసిందే. భారత్ నుంచి పారిపోయిన చోక్సీ అంటిగ్వాలో తలదాచుకుంటున్నాడు. అయితే అక్కడి కోర్టులో న్యాయవిచారణను ఎదుర్కోంటున్న ఆయన అక్కడి నుంచి అదృశ్యమయ్యాడు. ఆయన అంటిగ్వా నుంచి పారిపోయి  డొమినికా పోలీసులకు చిక్కినట్టు తెలుస్తోంది. ఈ నెల 25న అంటిగ్వాలో ఓ రెస్టారెంట్లో డిన్నర్ కు వెళ్లిన చోక్సీ ఆ తర్వాత మాయమయ్యాడు.

మెహుల్ చోక్సీ కోసం అంటిగ్వా పోలీసులు గాలించినప్పటికీ ఫలితం లేకుండా పోయింది. మరోవైపు, చోక్సీ దేశం విడిచి వెళ్లే అవకాశమే లేదని ఆ దేశ ప్రధాని కూడా చెప్పారు. అయితే, తాజాగా చోక్సీ డొమినికా పోలీసులకు చిక్కినట్టు అక్కడి మీడియా తెలిపింది. అతడిని అంటిగ్వా పోలీసులకు అప్పగించే ప్రయత్నాలు కొనసాగుతున్నాయి. కాగా, చోక్సీ సముద్రమార్గం ద్వారా అక్రమంగా డొమినికాకు వెళ్లి ఉండొచ్చని అంటిగ్వా ప్రధాని తెలిపారు. చోక్సీని నిర్బంధించి అటు నుంచి అటే అతడిని భారత్‌కు తరలించాలని అంటిగ్వా ప్రధాని డొమినికాను కోరారు.

పీఎన్బీ బ్యాంకు కుంభకోణం వెలుగులోకి రాగానే పెట్టా పేలా సర్ధుకుని దేశాన్ని వీడివెళ్లిన పలువురు ఆర్థిక నేరస్థుల బాటలోనే దేశం నుంచి పారిపోయి కరేబియన్ ద్వీపాల దేశమైన అంట్విగ్వా అండ్ బార్బుడాలో తలదాచుకుంటున్న చోక్సీ అకస్మాత్తుగా అక్కడి నుంచి కూడా అదృశ్యం కావడం సంచలనంగా మారింది. పీఎన్‌బీ కుంభకోణం కేసులో ఆరోపణలు ఎదుర్కొంటూ దేశం విడిచి పారిపోయిన మెహుల్ చోక్సీ, నీరవ్ మోదీలను సీబీఐ, ఈడీలు దేశానికి రప్పించేందుకు ప్రయత్నాలు చేస్తున్నాయి. ఇటీవల అంటిగ్వా ప్రధాని గాస్టన్ బ్రౌన్ మాట్లాడుతూ.. చోక్సీ పౌరసత్వాన్ని రద్దు చేసి అతడిని భారత్‌కు అప్పగిస్తామని చెప్పారు.