ఆంధ్రప్రదేశ్ లో 304కు చేరిన కరోనా కేసులు.. నాలుగు మరణాలు

Posted: 04/07/2020 11:16 AM IST

40 new coronavirus cases reported in andhra pradesh as of 9 00 am apr 07

ఆంధ్రప్రదేశ్ రాష్ట్రంలో కరోనా పాజిటివ్ కేసుల సంఖ్య రోజు రోజుకి వేగంగా పెరుగుతున్నాయి. రాష్ట్ర వ్యాప్తంగా పాజిటివ్ కేసుల సంఖ్య అంతకంతకూ పెరుగుతోంది. దేశవ్యాప్తంగా కరోనా కేసులు నాలుగు వేలకు దాటిపోగా.. ఆంధ్రప్రదేశ్ రాష్ట్రంలో ఈ కేసులు 266కు చేరుకున్నాయి. మర్కజ్‌ సదస్సు కేసులు రాష్ట్రంలో అంతకంతకూ పెరుగుతూనే ఉన్నాయి. గడిచిన 24 గంటల వ్యవధిలో ఆంధ్రప్రదేశ్ రాష్ట్రంలో ఏకంగా 40 కేసులు నమోదయ్యాయి. దీంతో మొత్తం ఈ వ్యాధి బారిన పడిన వారి సంఖ్య 304కు చేరింది. ఇక కరోనా బారిన పడి ఓ వ్యక్తి క్రితం రోజున కోలుకోగా మొత్తంగా నాలుగు మరణాలు సంభవించాయి.

కర్నూలు జిల్లాకు చెందిన వ్యక్తి (45) కరోనాతో బాధపడుతూ ఇవాళ మృతి చెందాడు. దీంతో కరోనా మృతుల సంఖ్య రాష్ట్రంలో నాలుగుకు చేరింది. ఇప్పటి వరకు ఆరుగురు బాధితులు కరోనా నుంచి కోలుకుని డిశ్చార్జి అయ్యారు. కొత్తగా నమోదైన కేసులను కలుపుకున్న తరువాత వివిధ జిల్లాల్లో నమోదైన కరోనా కేసుల వివరాలు ఇలా వున్నాయి, అనంతపురం-6, చిత్తూరు 17, తూర్పు గోదావరి 11, గుంటూరు 33, కడప 27, కృష్ణాలో 29, కర్నూలులో 74, నెల్లూరులో 42, ప్రకాశంలో 24, విశాఖపట్నంలో 20, పశ్చిమ గోదావరిలో 21 కరోనా పాజిటివ్‌ కేసులు నమోదయ్యాయి. కాగా శ్రీకాకుళం, విజయనగరం జిల్లాల్లో ఒక్క కరోనా పాజిటివ్ కేసు కూడా నమోదు కాలేదు.

ఏపీలో కరోనా కేసుల సంఖ్య రోజు రోజుకి పెరిగిపోతున్న నేపథ్యంలో ఆంధ్రప్రదేశ్‌ ముఖ్యమంత్రి వైఎస్‌ జగన్‌మోహన్‌రెడ్డి కీలక నిర్ణయం తీసుకున్నారు. ఇకపై ప్రతి ఆస్పత్రిలో విధిగా ఐసోలేషన్‌ వార్డును ఏర్పాటు చేయాలని అధికారులను ఆదేశించారు. కరోనా లక్షణాలతో ఎవరు వచ్చినా చికిత్స అందించాలన్నారు. కరోనా నియంత్రణపై ఆంధ్రప్రదేశ్‌ సీఎం జగన్‌ సమీక్ష నిర్వహించారు. ఢిల్లీ మర్కజ్‌కు వెళ్లొచ్చినవారిని గుర్తించి త్వరగా పరీక్షలు నిర్వహించాలని అధికారులను ఆదేశించారు. ఇంటింటి ఆరోగ్య సర్వే నిరంతరం జరుగుతుండాలని ఆదేశించారు. కరోనా వ్యక్తులకు చికిత్స అందించే సమయంలో వైద్యసిబ్బంది తగిన జాగ్రత్తలు తీసుకోవాలని సూచించారు.