పాస్ పోర్టు కావాలా.. ఎలాంటి తనిఖీలు లేకుండానే ఇక..

Posted: 08/22/2017 07:22 PM IST

విదేశాల్లోని మీ బంధువుల ఇంటికి వెళ్లాలని ప్లాన్ చేస్తున్నారా..? సరే అయితే పాస్ పోర్టు వుందా..? లేదా..? తత్కాల్ తరహాలో వేగవంతంగా పాస్ పోర్టు కోసం దరఖాస్తు చేసుకున్నారా..? అయినా ఎస్బీ (స్పెషల్ బ్రాంచి) పోలీసుల తనిఖీ కాకపోవడంతో అలస్యం జరుగుతుందా..? మరికోన్ని రోజులు ఇలాగే వుంటుంది. రమారమి మరో ఏడాది తరువాత ఏ తనిఖీలు లేకుండానే మీకు పాస్ పోర్టు జారీ అవుతుంది. నమ్మశక్యంగా లేకపోయినా ఇది ముమ్మాటికీ నిజం.

పాస్ పోర్టు జారీ ప్రక్రియలో ఇక పోలీసుల తనిఖీలు ఉండవు. అయితే ఇందుకోసం మరో ఏడాది పాటు అగాల్సివుంటుంది. పాస్ పోర్టు కోసం దరఖాస్తుదారుడి ఇంటికి వచ్చి ఆరా తీసే పోలీసులు ఇకపై అలా చేయాల్సిన అవసరం లేకుండా కేంద్ర హోంశాఖ చర్యలు తీసుకుంటుంది. దరఖాస్తుదారుడి పూర్వపరాల పరిశీలన త్వరలోనే మౌస్ పై ఒక్క క్లిక్‌తో పూర్తయిపోతుంది. నేరాలు, నేరగాళ్ల ట్రాకింగ్ నెట్‌వర్క్, సిస్టమ్స్ ప్రాజెక్టుకు పాస్ పోర్టు సేవలను అనుసంధానం చేయడం ద్వారా.. దరఖాస్తుదారులకు నేర చరిత్ర ఉన్నదీ లేనిదీ వెంటనే తెలిసిపోతుంది. అయితే ఈ విధానం పూర్తిగా అమల్లోకి రావడానికి మరో ఏడాది కాలం పట్టే అవకాశం వుంది.
 
అంతేకాదు.. ఇకపై దేశంలో ఏ మారుమూల ఏ నేరం జరిగినా.. నేరగాళ్లు ఎక్కడికీ తప్పించుకోలేరు. నేరాలు, నేరగాళ్ల ట్రాకింగ్ నెట్‌వర్క్, సిస్టమ్స్ ప్రాజెక్టు (సీసీటీఎన్‌ఎస్‌) కింద దేశంలోని అన్ని రాష్ట్రాల నేర రికార్డులను కేంద్ర ప్రభుత్వం ఆన్ లైన్ లో పొందుపర్చింది. ఇందుకోసం ఇప్పటికే కేంద్రం దేశంలోని 15,398 పోలీసు స్టేషన్లకు గాను 13,775 స్టేషన్ల వివరాలను ‘డిజిటల్ పోలీసు పోర్టల్ లో అప్ లోడ్ చేసింది. ఈ పోర్టల్ ను కేంద్ర హోం మంత్రి రాజ్‌నాథ్‌ సింగ్‌ ప్రారంభించారు. ఈ సందర్భంగా ఆయన మాట్లాడుతూ ఈ పోర్టల్లోని వివరాలు దేశంలోని అన్ని రాష్ట్రాల పోలీసులతో పాటు, కేంద్ర దర్యాప్తు సంస్థలకు కూడా అందుబాటులో ఉంటాయని చెప్పారు.
 
2018 మార్చిలోపు అన్ని పోలీసు స్టేషన్ల రికార్డులను ఆన్ లైన్ లో ఉంచనున్నట్లు పేర్కొన్నారు. ఇప్పటి వరకు నేరగాళ్లను పట్టుకోవడంలో రాష్ట్రాల మధ్య కొరవడిన సమన్వయం ఈ పోర్టల్ తో సమసిపోతుందని, దేశంలో ఎక్కడ నేరం చేసిన వారైనా ఏ మారుమూల ఉన్నా సులభంగా పట్టుకోవచ్చన్నారు. కాగా ఈ ప్రాజెక్టుకు తెలంగాణ రాష్ట్రాన్ని కేంద్రం హోం మంత్రత్వ శాఖ పైలట్ ప్రాజెక్టుగా ఎంపిక చేసింది.