న్యాయం కోసం కోర్టు మెట్లెక్కిన టీడీపీ ఎంపీ

Posted: 07/12/2017 03:13 PM IST

Tdp mp wants to fight for justice in court on travel ban

రాష్ట్ర రాజకీయ దిగ్గజాలలో ఒకరైన అనంతపురం టీడీపీ ఎంపీ జేసీ దివాకర్ రెడ్డి తనకు జరిగిన పరాభవంపై న్యాయపోరాటం చేసేందుకు సిద్దమయ్యారు. కేంద్రంలో మిత్రపక్ష బీజేపి అధికారంలో వున్నా.. రాష్ట్రంలో తాను గెలిచిన తెలుగుదేశం ప్రభుత్వమే అధికారంలో వున్నా.. ఆయనకు జరగాల్సిన పరాభవం మాత్రం జరిగిపోయింది. దీంతో ప్రభుత్వాలను ఏమీ అనలేక.. సదరు శాఖను నిర్వహిస్తున్నది కూడా తన పార్టీకి చెందిన సహచరుడే అయినా.. అతడ్ని కూడా అశ్రయించలేక.. చివరకు న్యాయమేవ జయతే అంటూ కోర్టు మెట్లెక్కారు.

విశాఖపట్నం విమానాశ్రయంలో బోర్డింగ్ టికెట్ కోసం తాను అడుగుతున్నా అధికారులు పట్టించుకోకపోవడంతో.. అసహనంతో వారిని నిలదీసినందుకు.. తాను దురుసుగా ప్రవర్తించానని ఇండిగో విమాన సిబ్బంది గగ్గొలు చేశారని ఆయన ఇప్పటికే ప్రకటించారు. అయితే ఇండిగో విమాన సిబ్బంది మాత్రం తమను దివాకర్ రెడ్డి వెనకనుంది నెట్టివేశారని, అంతటితో అగకుండా తమ కార్యాలయ కౌంటర్ లోకి వచ్చి నానా హంగామా చేశారని తెలిపారు.

ఇండిగో సిబ్బంది పట్ల దివాకర్ రెడ్డి దురుసుగా వ్యవహరించిన నేపథ్యంలో, ఆయనపై 8 విమానయాన సంస్థలు నిషేధం విధించాయి. దీంతో ఆయన న్యాయం కోసం కొర్టులను అశ్రయించారు. తనపై ఎయిర్ లైన్స్ సంస్థలు నిషేధం విధించడాన్ని సవాల్ చేస్తూ ఆయన పిటిషన్ దాఖలు చేశారు. ఈ పిటిషన్ ను విచారించిన హైకోర్టు కేసును మరో బెంచ్ కు బదిలీ చేయాలని ఆదేశించింది. దీంతో బదిలీ అయిన తరువాత తదుపరి విచారణ జరగనుంది. ఇదిలావుండగా ఈ వివాదాన్ని వెంటనే పరిష్కరించుకోవాలంటూ జేసీకి ముఖ్యమంత్రి చంద్రబాబు కూడా సూచించారు.