పవన్ కళ్యాణ్ స్పెషల్ సెల్యూట్ దేనికి?

Posted: 04/26/2017 08:48 AM IST

ఉద్యమాల పురిటి గడ్డగా పేరొందిన ఉస్మానియా యూనివర్సిటీ తన వందేళ్ల ఉత్సవాలకు సిద్ధమైపోయింది. ఈ నేపథ్యంలో నటుడు, జనసేన పార్టీ అధినేత పవన్ కళ్యాణ్ ప్రత్యేక శుభాకాంక్షలు తెలిపారు. ప్రత్యేకంగా తన భావాలను పంచుకుంటూ ఉస్మానియా యూనివర్సిటీకి వందనం పేరుతో ఓ ప్రెస్ నోట్ విడుదల చేయటం విశేషం.

``తమసోమా జ్యోతిర్గమయ అనే దివ్య సూక్తిని తన నుదుటన ధరించి - లక్షలాదిమందికి జ్ఞాన వెలుగులను పంచిపెడుతున్న ఉస్మానియా విశ్వవిద్యాలయానికి ప్రణామాలు అర్పిస్తున్నాను. బ్రిటిష్ విద్యావేత్త విల్చెడ్ సుయిన్ బ్లంట్ ఆలోచనల్లో ఊపిరిపోసుకుని ఏడో నిజాం నవాబ్ ఉస్మాన్ మీర్ అలీఖాన్ చేతుల మీదుగా రూపుదిద్దుకున్న ఈ తల్లి నీడలో చదువుకున్న ఎందరో విద్యార్థులు మేధావులు - శాస్త్రవేత్తలు - ఇంజినీర్లు - డాక్టర్లు - కళాకారులుగా దేశానికి సేవలు అందిస్తూనే వున్నారు. తెలుగు ముద్దుబిడ్డ ఈ దేశ ప్రధానమంత్రి పీఠం అధిష్టించిన పి.వి.నరసింహారావు ఈ తల్లి ఒడిలో పెరిగినవాడే.

ముఖ్యమంత్రులు - మంత్రులను తీర్చిదిద్దిన ఈ చదువుల మాత శత వసంతాల పండుగను రేపటి నుంచి జరుపుకుంటున్న శుభ సందర్భంగా నా తరపున - జనసేన శ్రేణుల తరుపున శుభాకాంక్షలు... జైహింద్`` అంటూ పవన్ శుభాకాంక్షలు తెలియజేశాడు. 1917 లో కేవలం 25 మంది బోధనాసిబ్బంది, 225 మంది విద్యార్థులతో ప్రారంభమైన ఈ విశ్వవిద్యాలయం, నేడు 10,000 లకు పైగా విద్యార్థులు, 1200 మంది టీచింగ్ స్టాఫ్ తో కొనసాగుతోంది. నేడు(బుధవారం) రాష్ట్రపతి ప్రణబ్‌ ముఖర్జీ చేతుల మీదుగా ఓయూ శతజయంతి ఉత్సవాలు మధ్యాహ్నం నుంచి మొదలవుతాయి.