ఆ రియల్ హీరో ఎలాగైనా బతకాలి

Posted: 04/26/2017 07:39 AM IST

ఛత్తీస్ గఢ్ సుక్మా లో మావోల ఘాతుకం ఓ ఘోరమైన హత్యాకాండగా హోం మంత్రి రాజ్ నాథ్ సింగ్ అభివర్ణించిన విషయం తెలిసిందే. భోజనం చేస్తున్న సీఆర్‌పీఎఫ్ జవాన్లపై విచక్షణ రహితంగా కాల్పులు జరిపి 26 మందిని మట్టుబెట్టిన ఘటన కలిచివేస్తోంది. జనాల సాయంతో మావోలు ఈ దారుణ మారణ కాండకు పాల్పడటం శోచనీయం. పైగా దాడి చేసిన వారిలో 70 శాతం మంది మహిళా నక్సల్స్ ఉండటం విశేషం.

అయితే దాడి సందర్భంగా ఓ జవాను ప్రదర్శించిన సాహసం ఔరా అనిపిస్తోంది. అతడిని చూసి దేశం గర్వించటమే, అతను త్వరగా కోలుకోవాలని అతని స్వంత గ్రామ ప్రజలు ఇప్పుడు పూజలు చేస్తున్నారు. అన్ని వైపుల నుంచి నక్సల్స్ తూటాలు కురిపిస్తున్నా, శరీరం జల్లెడలా మారినా ఏమాత్రం లెక్కచేయకుండా సహచరులను కాపాడేందుకు ఎదురొడ్డి నిలిచాడు. ఒక్కడే ఐదుగురు మావోలను మట్టుబెట్టాడు. ఆ వీరజవాను పేరు షేర్ మహమ్మద్. ప్రస్తుతం రాయ్‌పూర్ ఆస్పత్రిలో ప్రాణాలతో పోరాడుతున్నాడు.

ఉత్తరప్రదేశ్‌లోని బులంద్‌షహర్ జిల్లా ఆసిఫాబాద్ గ్రామానికి చెందిన షేర్ సీఆర్‌పీఎఫ్ 74వ బెటాలియన్‌లో సభ్యుడిగా నాలుగేళ్ల నుంచి చత్తీస్‌గఢ్‌లో పనిచేస్తున్నాడు. అతడి తండ్రి నూర్ మహమ్మద్, మామ అబ్దుల్ సలాం కూడా సైనికులుగా దేశానికి సేవలు చేశారు. ఆస్పత్రిలో చికిత్స పొందుతున్న షేర్ మహమ్మద్ మాట్లాడుతూ మావోల దాడిని వివరించాడు. నక్సల్స్ ఏకే 47, ఎస్ఎల్ఆర్ ఆయుధాలతో దాడి చేశారని పేర్కొన్నాడు. తానొక్కడినే నలుగురు నక్సల్స్ గుండెల్లో గురిపెట్టి కాల్చినట్టు తెలిపాడు. దేశసేవలో తన భర్త ప్రాణాలు కోల్పోయాడని, ఓ కుమారుడు ఆర్టీవోలో ఇన్‌స్పెక్టర్‌గా ఉన్నాడని, తన మనవడిని కూడా ఆర్మీలో చేర్పిస్తానని షేర్ మహమ్మద్ తల్లి ఫరీదా చెప్పుకొచ్చింది.