అఫీషియల్ : కాలేజీ బాత్ రూంలో సీసీ కెమెరాలు

Posted: 01/28/2017 08:46 AM IST

తమిళనాడులో ఓ కాలేజీ యాజమాన్యం తీరుపై తీవ్ర విమర్శలు వినిపిస్తున్నాయి. ఏకంగా టాయ్ లెట్ లలో సీసీ కెమెరాలు అమర్చింది కళాశాల యాజమాన్యం. దీనిపై తల్లిదండ్రులు సహా అంతా నిరసన వ్యక్తం చేస్తున్నారు. అయితే తాము ఆ పని చేయడానికి ఓ కారణం ఉందంటూ వారు చెబుతున్నారు.

పూర్తి వివరాల్లోకి వెళ్లితే... త‌మిళ‌నాడు కోయంబ‌త్తూరులోని కోవైపుదూరులో వీఎల్‌బీ జానికియ‌మ్మాళ్ ఆర్ట్స్ అండ్ సైన్స్ క‌ళాశాల ఉంది. దానికి మేనేజ్ మెంట్ ఈ మధ్యే మ‌రుగుదొడ్ల‌లో సీసీ కెమెరాలు ఏర్పాటు చేసింది. అంతేకాదు అందులోకి వెళ్లే విద్యార్థులు తప్పనిసరిగా ప్యాంట్లు విప్పేసి వెళ్లాలి. ఊరికే కాదు లేండి అక్కడున్న లుం‌గీని కట్టుకుని వెళ్లాలంటూ ఆంక్ష‌లు విధించింది. ఈ మేర‌కు వారం క్రితం క‌ళాశాల ప్రిన్సిపాల్ ఆదేశాలు జారీ చేశారు. దీంతో స‌ర్వ‌త్ర నిర‌స‌న‌లు వెల్లువెత్తుతున్నాయి.

అయితే టాయిలెట్ల‌లో తామేం ఊరికే సీసీ కెమెరాలు ఏర్పాటు చేయ‌లేద‌ని ప్రిన్స్ పాల్ చెబుతున్నారు. ఇటీవ‌ల స్టాఫ్‌రూంలో ఉన్న టాయిలెట్‌లో కొంత మంది తుంటరి విద్యార్థులు నాటు బాంబు పెట్టారని, అది పేలి తొండైతున్నె అనే లెక్చ‌ర‌ర్ తీవ్రంగా గాయ‌ప‌డ్డాడని, అందుకే ఈ ఏర్పాటు చేశామ‌ని చెబుతున్నాడు. ఏది ఏమైనా మరీ టాయిలెట్ల‌లో సీసీ కెమెరాలు ఏంటంటూ నిల‌దీస్తున్నారు. ఈ విష‌యం కాస్తా ఇప్పుడు సోష‌ల్ మీడియాలో వైర‌ల్ అయింది.