ఉత్సవాలకు సిద్దమైతున్న వేళ.. పెను విషాదం..

Posted: 12/11/2016 10:13 AM IST

మరో పక్షం రోజుల వ్యవధిలో వస్తున్న క్రీస్మస్ పండుగను పురస్కరించుకుని జరుగుతున్న ఉత్సవాలకు ముస్తాబవుతున్న వేళ నైజీరియాలో పెను విషాధం సంభవించింది. భక్తులు ప్రార్థనలు చేసుకుంటున్న తరుణంలో ఈ ఘటన చోటుచేసుకుంది. నైజీరియాలోని ఆక్వా ఇబోమ్ రాష్ట్రంలోని ఉయోలో నిర్మాణంలో ఉన్న ‘ది రెయినర్స్ బైబిల్ చర్చ్’ అనూహ్యంగా కూలిపోవడంతో దాదాపు 200 మంది మరణించారు.. క్రిస్మస్ వేడుక నేపథ్యంలో చర్చిలో జరిగిన ఓ కార్యక్రమానికి  క్రైస్తవులు హాజరై ప్రార్థనలు చేస్తుండగా ఈ ప్రమాదం జరిగింది. ఆక్వా ఇబామ్ రాష్ట్ర గవర్నర్ ఉడోం ఇమ్మాన్యువల్ కూడా ఈ సంఘటన జరిగిన సమయంలో చర్చిలోనే ఉన్నారు.

అయితే ఇమ్మాన్యువల్కు ఎలాంటి గాయాలు కాలేదని, ప్రమాదం నుంచి తృటిలో తప్పించుకున్నారని అధికారులు వెల్లడించారు. ఈ సంఘనపై  నైజీరియా అధ్యక్షుడు ముహమ్మదు బుహారీ తీవ్ర దిగ్భ్రాంతి వ్యక్తం చేశారు. శకలాల తొలగింపు ప్రక్రియ కొనసాగుతోందని, ఇప్పటి వరకు 60 మృతదేహాలను బయటకు తీసినట్టు అధికారులు తెలిపారు. మృతుల సంఖ్య మరింత పెరిగే అవకాశం ఉందన్నారు. ఈ ప్రమాద ఘటనపై ఉడోం ఇమ్మాన్యువల్ దర్యాప్తుకు ఆదేశించారు. చర్చి ఇంకా నిర్మాణ దశలోనే ఉండగా, క్రిస్మస్ సమీపిస్తుండగా వేగంగా పైకప్పు పనులను పూర్తి చేయడంతో ప్రమాదం చోటు చేసుకుందని ప్రత్యక్ష సాక్షులు చెబుతున్నారు.