పాకిస్థాన్ పీచమణిచిన టీమిండియా.. టైటిల్ కైవసం

Posted: 10/30/2016 09:04 PM IST

దీపావళి పర్యదినం రోజున భారత్ తన సత్తాను చాటింది. కాకతాళీయంగా కలసివచ్చిన ఆసియా చాంపియన్స్ ట్రోఫీ పురుషుల హాకీ టోర్నోమెంటులో టీమిండియా తన అద్భుత ప్రతిభను చాటింది. ఈ టోర్నీ ఆరంభం నుంచి అప్రతిహాత విజయాలతో ముందుకు దూసుకెళ్తున్న టీమిండియా ఫైనల్స్ లో పాకిస్థాన్ పీచమణిచి టైటిల్ ను కైవసం చేసుకుంది.. ఆదివారం రాత్రి దాయాది పాకిస్థాన్ తో హోరాహోరీగా జరిగిన ఫైనల్లో భారత్ 3-2 స్కోరుతో విజయం సాధించింది. దీపావళి రోజున భారత హాకీ ఆటగాళ్లు ట్రోఫీ సాధించి భారతీయులకు కానుకగా అందించారు.
 
భారత హాకీ జట్టు అభిమానుల అంచనాలను తలకిందులు చేసింది. అభిమానుల ఊహాలకు కూడా అందని విధంగా టోర్నీలో రాణించడంతో ఫైనల్ మ్యాచ్ పై సర్వత్రా ఉత్కంఠ పెరిగింది. దీంతో ఈ మ్యాచ్‌ ఆద్యంతం ఉత్కంఠగా సాగింది. భారత ఆటగాడు రూపిందర్‌ పాల్‌ సింగ్‌ తొలి గోల్‌ సాధించి జట్టుకు శుభారంభం అందించాడు.  23వ నిమిషంలో భారత ఆటగాడు అఫాన్‌ యూసుఫ్‌ మరో గోల్‌ చేయడంతో ఆధిక్యం 2-0కి పెరిగింది. కాగా ఆ తర్వాత పాక్‌ వరుసగా రెండు గోల్స్‌ చేయడంతో ఇరు జట్ల స్కోర్లు 2-2తో సమమయ్యాయి.

ఈ దశలో తీవ్ర ఉత్కంఠ ఏర్పడింది. మ్యాచ్‌ మరికొద్ది నిమిషాల్లో ముగుస్తుందనగా, నికిన్‌ తిమ్మయ్య గోల్‌ చేయడంతో భారత్‌ మళ్లీ 3-2 ఆధిక్యంలోకి దూసుకెళ్లింది. ఆ తర్వాత పాక్‌ ఆటగాళ్లు గోల్‌ చేయలేకపోయారు. భారత్‌ మ్యాచ్‌తో పాటు ట్రోఫీని సొంతం చేసుకుంది. ఓవరాల్‌గా భారత్‌ ఆసియా చాంపియన్స్‌ ట్రోఫీని గెలవడమిది రెండోసారి. భారత హాకీ జట్టుకు రాష్ట్రపతి ప్రణబ్‌ ముఖర్జీ, ప్రధాని నరేంద్ర మోదీ సహా పలువురు రాజకీయ, సనీ, క్రీడా ప్రముఖులు అభినందనలు తెలిపారు. ఇక నెట్ జనులు కూడా టీమిండియా హాకీ జట్టుకు శుభాకాంక్షలు తెలుపుతున్నారు.