పాఠశాలలో పైశాచికం.. విద్యార్థుల ఎదుటే దుశ్యాసన పర్వం..

Posted: 08/08/2016 01:36 PM IST

ఉత్తరప్రదేశ్‌లో దారుణం జరిగింది. యూపీ ఆగ్రాలోని పాఠశాలలో పైశాచిక ఘటన చోటుచేసుకుంది. కస్‌గంజ్ ప్రైమరీ స్కూల్లో టీచర్‌గా పనిచేస్తున్న ఓ వివాహితపై విద్యార్థుల ఎదుటే దుశ్యాసన పర్వం జరిగింది. వివాహిత టీచర్ ను లొంగదీసుకోవాలని యత్నించిన మరో ఉపాధ్యాయుడిని అమె చెంపదెబ్బతో అవమానించడంతో ఏకంగా నలుగురు రౌడీలను వెనకేసుకుని వచ్చిన ఉపాధ్యాయుడు విద్యార్థులు వున్నారన్న విషయాన్ని కూడా మర్చిపోయి అమె ఒంటిపై వేసుకన్న దుస్తులను తరగతి గదిలోనే చించివేసి ఘోరంగా అవమానించాడు.

వివరాల్లోకి వెళ్తే.. యూపీలోని అగ్రాలో గల కస్‌గంజ్ ప్రైమరీ స్కూల్లో టీచర్‌గా పనిచేస్తున్న ఓ వివాహితపై అదే స్కూల్లో పనిచేస్తున్న జితేందర్ అనే ఉపాధ్యాయుడి కన్నుపడింది. జితేందర్ ఆ యువతిని కొద్దిరోజులుగా వేధింపులకు గురిచేస్తున్నట్లు తెలిసింది. అమెను లొంగదీసుకుని తన వాంఛ తీర్చుకోవాలని భావించాడు. ఈ క్రమంలో ఒకరోజు స్కూల్ నుంచి ఇంటికి వెళుతుండగా జితేందర్ ఆమెను అడ్డగించాడు. అమెతో అసభ్యపదజాలాన్ని వాడాడు. దీంతో కోపోద్రిక్తురాలైన ఆ యువతి చెంపదెబ్బ కొట్టింది.

దీంతో అమెపై పగ పెంచుకున్న జితేందర్ ఆమెపై కసి తీర్చుకోవాలనుకున్నాడు. ఈ నేపథ్యంలోనే శనివారం స్కూల్లో క్లాస్ రూమ్‌లో పాఠాలు చెబుతున్న యువతిని అక్కడే దుస్తులు చించి అమానుషంగా ప్రవర్తించాడు. జితేందర్‌తో పాటు వెళ్లిన మరో నలుగురు కూడా ఆమెను విద్యార్థులందరి ముందూ క్లాస్‌రూమ్‌లో వేధింపులకు గురిచేశారు. వారి నుంచి తప్పించుకున్న ఆ యువతి స్టాఫ్ రూమ్‌ వైపుగా పరుగులు తీసింది. దీంతో జితేందర్ పరారయ్యాడు. జితేందర్ తన ఇంటి ఎదురుగా ఉంటాడని, తనకు పెళ్లయిందని చెప్పినా వినకుండా తరచూ వెంటపడి వేధిస్తున్నాడని ఆ యువతి పోలీసులకు ఫిర్యాదు చేసింది. పోలీసులు జితేందర్‌ను అదుపులోకి తీసుకుని విచారిస్తున్నారు.