భార్య, మామలను నరికి చంపాడు. ఎందుకు...?

Posted: 07/21/2016 08:53 AM IST

అదనపు కట్నం అనే రోగంతో ఓ భర్త దారుణానికి పాల్పడ్డాడు. కృష్ణా జిల్లాలో ఓ వ్యక్తి భార్యతోసహా మామను పొట్టనబెట్టుకున్నాడు. చాట్రాయి మండలం కోటపాడు గ్రామంలో మంగళవారం అర్థరాత్రి దాటాక ఈ ఘోరం జరిగింది. 

గ్రామానికి చెందిన సబ్రహ్మణ్యం అనే వ్యక్తి భార్య విజయను అదనపు కట్నం కోసం మూడేళ్లుగా వేధిస్తున్నాడు. ఈ క్రమంలో ఆమె తల్లిదండ్రులు పోలీస్ ఫిర్యాదు కూడా చేశారు. వారిద్దరినీ పిలిచి కౌన్సిలింగ్ ఇచ్చి అనంతరం పోలీసులు వదిలేశారు. ఆ కోపంతో మృగంలా మారిన అతను గత రాత్రి కత్తిచేతబట్టి భార్య సహా మామ, అత్త, బావమరిదిపై దాడికి దిగాడు. 

భార్య విజయతో పాటు మామ వెంకటేశ్వరరావులను నరికేశాడు. రెప్పపాటులో జరిగిన ఈ దాడిలో వారిద్దరూ అక్కడికక్కడే చనిపోయారు.ఈ దాడిని అడ్డుకోబోయిన తన బావమరిది శివరామకృష్ణ, అత్తపైనా సుబ్రహ్మణ్యం దాడి చేశాడు. శివరామకృష్ణకు తీవ్ర గాయాలు కాగా అతడి తల్లి స్వల్ప గాయాలతో బయటపడింది.

దాడి అనంతరం సుబ్రహ్మణ్యం అక్కడి నుంచి పరారయ్యాడు. ఈ క్రమంలో అతడిని ఆపేందుకు యత్నించిన బంధువు వెంకటేశ్వరరావుపైనా అతడు దాడికి దిగాడు. ఈ దాడిలో వెంకటేశ్వరరావుకు కూడా తీవ్ర గాయాలయ్యాయి. అయితే కాస్తంత అప్రమత్తంగా వ్యవహరించిన పొరుగు గ్రామం పర్వతపురం గ్రామస్తులు ఎట్టకేలకు అతడిని నిలువరించి పోలీసులకు పట్టించారు.