బ్యాంకులు నేడు, రేపు నడుస్తాయి

Posted: 07/12/2016 09:22 AM IST

స్టేట్ బ్యాంకు ఆఫ్ ఇండియాలో ఐదు బ్యాంకుల విలీనంతోపాటు, ఐడీబీఐ బ్యాంకును ప్రవేటీకరణ చేయటాన్ని వ్యతిరేకిస్తూ బ్యాంకు ఉద్యోగులు ఈ నెల 12, 13 అంటే ఈ రోజు, రేపు తలపెట్టిన బ్యాంకు సమ్మెను వాయిదా వేస్తున్నట్లు ప్రకటించాయి.

ఢిల్లీ హైకోర్టు సోమవారం ఇచ్చిన ఆదేశాల మేరకు సమ్మెను వాయిదా వేసుకుంటున్నట్లు అఖిల భారత బ్యాంక్ ఉద్యోగుల సంఘం ప్రధాన కార్యదర్శి వెంకటాచలం ఓ ప్రకటనలో తెలిపారు.

బ్యాంకు ఉద్యోగుల సమ్మెపై దాఖలైన పిటిషన్ ను నిన్న విచారించిన ఢిల్లీ హైకోర్టు... సమ్మెను ఉద్యోగులు వాయిదా వేసుకోవాలని సూచించింది. కోర్టు ఆదేశాలతో కాస్తంత వెనక్కు తగ్గిన ఉద్యోగులు కూడా సమ్మెను వాయిదా వేసుకునేందుకు సిద్ధపడ్డారు. ఈ క్రమంలోనే ఉద్యోగుల సంఘం నుంచి నిన్న సాయంత్రానికే ప్రకటన వెలువడింది. సమ్మె వాయిదా పడటంతో నేడు, రేపు యథావిధిగా బ్యాంకులు పనిచేయనున్నాయి.