భార్యను దానం చేసిన మొగుడు... ఎక్కడ?

Posted: 06/29/2016 04:32 PM IST

మనిషికి స్వార్థం నానాటికి పెరిగిపోతున్న రోజుల్లో ఎదుటి వారి సుఖం కోసం ప్రయత్నించే వారు ఎవరుంటారు చెప్పండి. అలాంటిది తన భార్య సంతోషం కోసం ఓ భర్త చేసిన త్యాగం చరిత్రలో నిలిచిపోతుందనటంలో ఎలాంటి సందేహం అక్కర్లేదు. చైనాకు చెందిన ఈ దంపతుల కథ వింటే ఎవరైనా కదిలిపోవాల్సిందే.

జియాంగ్, జుపింగ్ జువాన్ ప్రావిన్స్ లో నివసించే ఓ జంట. వీరికి 1996 లో పెళ్లయింది. పదేళ్లపాటు ఎంతో అన్యోన్యంగా కాపురం చేసిన ఈ జంటపై ఎవరి కళ్లుపడ్డాయో తెలీదుగానీ ఓ యాక్సిడెంట్ తో జియాంగ్ జీవశ్చవంలా మారిపోయాడు. ఎడమవైపు బాడీ పూర్తిగా పడిపోవటంతో మంచానికే పరిమితమయ్యాడు. ఇక అప్పటి నుంచి కదల్లేని భర్త సేవలోనే ఆ భార్య మునిగిపోయింది.

ఆమె కష్టాన్ని చూడలేకపోయినా జియాంగ్ మరో పెళ్లి చేసుకోవాలంటూ జుపింగ్ పై ఎన్నోసార్లు ఒత్తిడి తెచ్చాడు. కానీ, అందుకు ఆమె అస్సలు ఒప్పుకోలేదు. చివరికి భర్త ఒత్తిడితో జియాంగ్ కు విడాకులిచ్చి 2013 లో ఆమె మరో వివాహం చేసుకుంది. అతను మరెవరో కాదు. జియాంగ్ ప్రాణ స్నేహితుడే. ఇక అప్పటి నుంచి ఈ ముగ్గురు కలిసే ఉంటున్నారు. జుపింగ్ తోపాటు, ఆమె కొత్త భర్త కూడా ఇప్పుడు జియాంగ్ సేవలో మునిగిపోయారు. ఓ చానెల్ కథనంతో వెలుగు లోకి వచ్చిన కథ ప్రస్తుతం సోషల్ మీడియాలో చక్కర్లు కొడుతోంది.