సోనియా అభ్యంతరకర ఫోటోతో ఒకరు బలి

Posted: 06/17/2016 10:17 AM IST

కాంగ్రెస్ అధినేత్రి సోనియా గాంధీ అభ్యంతకర ఫోటో ఒకటి వాట్సాప్ గ్రూప్ లో హల్ చల్ చేయగా, చెలరేగిన ఘర్షణలో ఒకరు చనిపోయారు. మధ్యప్రదేశ్ జబల్పూర్ లోని విజయ్ నగర్ ప్రాంతంలో ఈ దారుణం జరిగింది. ఘర్షణలో ఆరుగుర్ని గాయపడట్లు జబల్పూర్ సిటీ ఏరియా ఎస్పీ ఇంద్రజీత్ బల్సావర్ తెలిపారు. కాంగ్రెస్ కార్పొరేటర్ జతిన్ రాజ్ 'విజయ నగర్ ఫ్రెండ్స్' పేరిట వాట్స్ యాప్ గ్రూప్ క్రియేట్ చేశాడు. ఈ గ్రూపులో అదే ప్రాంతానికి చెందిన ప్రశాంత్ నాయక్ అనే వ్యక్తి సోనియా గాంధీ అభ్యంతరకర ఫోటో ఒకటి పోస్టు చేశాడు.

ఆమె పాత్రలు తోముతున్నట్లున్న ఓ వ్యంగ్య చిత్రాన్ని పోస్టు చేసి, 'సోనియాకు ఈ దుస్థితికి రావడానికి మోదీ కారణం' అన్నట్టు అర్థం వచ్చే వ్యాఖ్యను జత చేశాడు. దీంతో జతిన్ రాజ్ కు కోపం వచ్చింది. గత రాత్రి అహింసా చౌక్ లో వీరు తమ అనుచరులతో కలుసుకుని వాదించుకున్నారు. ఆ సమయంలో అటుగా వచ్చిన పోలీసులు, ఇరు వర్గాలను స్టేషన్ కు పిలిచారు. పోలీస్ స్టేషన్ కు చేరుకున్న ఇరు వర్గాలు అక్కడ కూడా వాదులాటకు దిగాయి. ఇది తీవ్ర రూపం దాల్చడంతో దాడులకు పాల్పడ్డారు.

అయితే, ఈ ఘటన స్టేషన్ బయట జరిగిందని ఎస్పీ చెప్పారు. 'కాదు స్టేషన్ లో పోలీసుల సమక్షంలోనే జరిగింద'ని కాంగ్రెస్ నేతలు ఆరోపిస్తున్నారు. సీసీ టీవీ ఫుటేజ్ పరిశీలించి అసలేం జరిగిందో విచారణ జరిపాకే చర్యలు తీసుకుంటామని ఇంద్రజీత్ తెలిపారు.

భాస్కర్