ఎగిరే పాములు.. మన దగ్గరే

Posted: 03/23/2016 01:32 PM IST

పాములను తలుచుకుంటే చాలా మందికి కలలో కూడా భయమే. మరి అదే పాములు గాలిలో కూడా ఎగురుతాయి..అవి మన దగ్గరే ఉన్నాయి అని తెలిస్తే ఇంకేమైనా ఉంటుందా. కానీ నిజం మన దగ్గరే ఎగిరే పాములున్నాయి. అయితే ఆ పాములు విషపూరితమైనవి కాదు అని పరిశోధకులు వెల్లడిస్తున్నారు. అయితే ఈ రకమైన పాములు ఎక్కడ ఉణ్నాయని అనుకుంటున్నారా..? మన పక్క రాష్ట్రం తమిళనాడులో ఉన్నాయి. తమిళనాడులోని కోయంబత్తూరు ప్రాంతంలో వీటిని పరిశోధకులు గుర్తించారు.

తమిళనాడులోని కోయంబత్తూరు ప్రాంతంలో కాలంపలయం గ్రామానికి చెందిన వెంకటేశన్ అనే రైతు తన పొలంలో పని చేస్తుండగా, ఓ చెట్టు మీద నుంచి మరో చెట్టు మీదకు ఆహారం కోసం గాల్లో ఎగురుతున్న పామును చూశాడు. వెంటనే అతను స్థానికంగా ఉండే పాములు పట్టేవాళ్లకు సమాచారం ఇచ్చాడు. వారు వచ్చి ఎగిరే పామును పట్టుకున్నారు. ఆ పామును ఫారెస్టు అధికారులకు అప్పగించారు. వారు దానిని పరిశీలించి అరుదైన క్రిసోపీలియా రకానికి చెందిన పాముగా గుర్తించారు. ఆగ్నేయ దేశాలైన వియత్నాం, కంబోడియాలలో ఈ రకమైన పాములు ఉంటాయని వారు వెల్లడించారు. బూడిద వర్ణంలో ఉండి, నల్లటి మచ్చలతో కూడిన ఈ పాము గాల్లో ఒకేసారి 20ఫీట్ల దూరం వరకు ఎగురుతుందని చెప్పారు. ఫారెస్టు అధికారులు దానిని పుతుపతి అటవీ ప్రాంతంలో వదిలేశారు.