లంచం ఇవ్వలేదని ‘చాంపియన్’ని చంపేసిన రైల్వే పోలీసు

Posted: 07/24/2015 10:57 AM IST

Fencing champion hoshiyar singh dies after allegedly shoved and thrown off train by railway police

ప్రపంచదేశాలతో పోటీపడుతున్న భారతదేశ గౌరవాన్ని మన నాగరికులే తమ స్వార్థం కోసం దిగజార్చుతున్నారు. అవినీతిని అరికట్టాల్సిన పోలీసులే దౌర్జన్యానికి దిగుతున్నారు. ప్రజల సంక్షేమం కోసం పనిచేయాల్సిన పోలీసులే దారుణంగా ప్రవర్తిస్తున్నారు. అధికారం వుంది కదా అని సామాన్య ప్రజలపై విరుచుకుపడుతున్నారు. ఇబ్బందుల్లో వున్నాం సహాయం చేయండంటూ ప్రజలు వేడుకుంటే.. లంచం ఇస్తేగానీ చేయమంటూ విర్రవీగుతున్నారు. ఇటువంటి నీచులవల్లే పేరుగాంచిన పోలీసులు సైతం తలెత్తుకోలేక తిరుగుతున్నారు. ఇంతకీ ఇదంతా ఎందుకు చెప్పుకోవాల్సి వచ్చిందంటే.. ఓ రైల్వే పోలీసు అధికారి తనకు లంచం ఇవ్వలేదని ఓ చాంపియన్ ప్రాణాలను బలిగొన్నాడు.

పూర్తి వివరాల్లోకి వెళ్తే.. యూపీకి చెందిన హోషియార్ సింగ్ అనే ఫెన్సింగ్ చాంపియన్ తన సొంత గ్రామానికి వెళ్లి.. అక్కడున్న తన తల్లి, భార్యను తీసుకుని నగరానికి తిరిగి వెళ్తున్నాడు. రిజర్వేషన్ కోసం ప్రయత్నించాడు కానీ లభించలేదు. దీంతో వారిద్దరిని లేడీస్ కోచ్ లో కూర్చోబెట్టి.. తాను వేరే బోగీలోకి ఎక్కాడు. కొద్దిసేపటివరకు ప్రయాణం సాఫీగానే సాగింది. అయితే.. మార్గమధ్యంలో తన భార్యకు సుస్తీగా వుందని తెలుసుకుని.. ఆ చాంపియన్ లేడీస్ కంపార్ట్ మెంటులోకి వచ్చాడు. దీన్ని చూసిన ఓ రైల్వే పోలీసు.. తనకు రూ.200 ఇస్తేనే ఆ బోగీలో వుండనిస్తానని డిమాండ్ చేశాడు. కానీ.. అందుకు హోషియార్ నిరాకరించడంతో ఆ పోలీసు నడుస్తున్న రైలు నుంచే అతడిని కిందకు తోసేశాడు. దీంతో ఆ చాంపియన్ అక్కడికక్కడే దుర్మరణం చెందాడు. తమ కళ్లముందే ఈ దారుణమైన ఘటన చోటు చేసుకోవడంతో ఆ చాంపియన్ కుటుంబసభ్యులు కన్నీరుమున్నీరయ్యారు. ఈ దారుణానికి ఒడిగట్టిన రైల్వే పోలీసుపై కఠిన చర్యలు తీసుకోవాలని, తమకు న్యాయం చేయాలని వారు డిమాండ్ చేస్తున్నారు.

ఇదిలావుండగా.. ఈ విషయంలో పోలీసుల కథనం మరోలా వుంది. హోషియార్ సింగ్ మంచినీళ్ల కోసం కిందకు దిగి, కదులుతున్న రైల్లోకి ఎక్కే ప్రయత్నంలో కాలు జారి మరణించాడని చెబుతున్నాడు. కానీ.. అతని కుటుంబసభ్యులు మాత్రం ఆ రైల్వే పోలీసే చంపాడని చెబుతున్నారు. చివరికీ ఈ కేసు ఏ మలుపు తిరుగుతుందో?