స్వచ్ఛ భారతం ముద్దంటున్న కెసిఆర్...మోదీపై వైఖరిలో మార్పు

Posted: 02/13/2015 11:17 AM IST

తెలంగాణ ముఖ్యమంత్రి కెసిఆర్ మోదీపై తన వైఖరిని మార్చుకున్నట్లున్నారు. ఎన్నికల సమయంలో మోదిపై విమర్శలు చేసిన కెసిఆర్..ఇప్పుడు మాత్రం మోదీ మనోడే అంటూ అందరికి ఆశ్చర్యాన్ని కలిగించాడు. నరేంద్ర మోది మన పక్షానే ఉన్నాడు అన్న కెసిఆర్, నీతి ఆయోగ్ పై నిర్వహించిన సమావేశంలోనూ ప్రశంసలు కురిపించారు. మొత్తానికి ఎన్నికల ముందు తిట్టిన మోదీనే ఇప్పుడు ఆకాశానికెత్తుతున్నారు కెసిఆర్. అప్పుడు అలా అంటే ఇప్పుడు ఇలా అంటున్నా అంటున్నారు మరి. మోదీ పాలన ఎంతో పారదర్శకంగా సాగుతోందని, నీతి ఆయోగ్ ఏర్పాటు ద్వారా రాష్ట్రాలకు మరింత బలం వస్తుందని, ఈ ఆలోచన చేసిన మోదీకి ధన్యవాదాలు తెలిపారు.

తాజాగా నరేంద్రమోదీ ఇచ్చిన స్వచ్ఛ భారత్ పైనా ప్రకటన చేశారు.  నెలలో ప్రతి మొదటి,మూడో శనివారాలలో స్వచ్చ భారత్ నిర్వహించాలని నిర్ణయించారు. ప్రభుత్వ ఆస్పత్రులు, కార్యాలయాలు, విద్యాలయాలు ఇలా అన్ని చోట్లా  స్వచ్ఛ్ భారత్ కార్యక్రమాలను నిర్వహించాలని అధికారులను ఆదేశించారు. ప్రధాని నరేంద్ర మోదీ స్వచ్ఛ భారత్ కోసం గత ఏడాది అక్టోబర్ రెండున పిలుపునిస్తే, కెసిఆర్ అప్పుడు ఒక్క మాటైనా అనలేదు. కానీ ఇప్పుడు మాత్రం అధికారులతో స్వచ్ఛ భారత్ ను పాటించాలని కోరడం విశేషం. మొత్తానికి ప్రధాని మోదీపై తన అభిప్రాయాన్ని మార్చుకున్నారు తెలంగాణ ముఖ్యమంత్రి కెసిఆర్. అయితే ఎందుకు ఇలాంటి మార్పులు వచ్చాయో అందరికి తెలుసు.