ఆ రెండిటికీ అధిక ప్రాధాన్యం

Posted: 01/17/2015 10:05 AM IST

దేశ అభివృద్ధికి బీజేపీ సర్కారు చేపట్టే చర్యలను ప్రధాని నరేంద్రమోడి మరోసారి వివరించారు. ఎకనమిక్ టైమ్స్ నిర్వహించిన గ్లోబల్ బిజినెస్ సమ్మిట్ లో మోడి ప్రసంగించారు. దేశాన్ని అభివృద్ధి చేసేందుకు వేగంగా సంస్కరణలు అమలు చేస్తామన్నారు. ఇందుకోసం పన్నులను స్థిరీకరించి, మౌళిక వసతులు కల్పిస్తామని హామి ఇచ్చారు. ప్రభుత్వ నిబంధనలను కూడా మారుస్తామని చెప్పారు. కొత్తవారికి ప్రోత్సాహకాలు అందించేందుకు తగిన చర్యలు తీసుకుంటామన్నారు. అంతేకాకుండా.., ప్రస్తుత అవసరాలకు అనుగుణంగా లేని నిబంధనలు, విధానాలను మార్చుకుంటూ అభివృద్ధి సాధిస్తామన్నారు.

సంస్కరణలు చిత్తశుద్ధిగా అమలు చేసినట్లే.., పకడ్బందీగా పారదర్శక కార్య్రమం చేపడుతామన్నారు. ఎక్కడా అవినీతి జరగకుండా ప్రభుత్వం పనిచేసేలా చూస్తామన్నారు. గత ప్రభుత్వ హయాంలో కుంభకోణాల వల్ల ఎంతో నష్టం జరిగిందన్నారు. ఈ నష్టాన్ని పూడ్చేందుకు మొక్కవోని అంకితభావం, దీక్షతో పని చేస్తామని చెప్పారు. అన్ని రంగాల్లో పెట్టుబడులు ఆకర్షించేందుకు కొత్త విధానాలు తీసుకువస్తున్నట్లు చెప్పారు. 2లక్షల కోట్ల దేశ ఆర్ధిక వ్యవస్థను 20 లక్షల కోట్ల ఆర్ధిక వ్యవస్థగా చేయాలన్నదే ప్రభుత్వ లక్ష్యమని వివరించారు. ఇందుకోసం ప్రతి ప్రభుత్వ విభాగం చట్టబద్దంగా పనిచేయాల్సిన అవసరముందని సూచించారు.